Madrid, 24 de outubro de 2025

O director xeral de Planificación e Ordenación Forestal, José Luis Chan, participou hoxe na mesa redonda Gobernanza e planificación e xestión forestal para a prevención das emerxencias no marco do foro de diálogo Bosques do Futuro: sociedade e xestión para un territorio resiliente organizado pola Asociación Española para a Sustentabilidade Forestal PEFC España. Alí, José Luis Chan defendeu as agrupacións forestais de xestión conxunta como unha ferramenta fundamental para avanzar na ordenación e o aproveitamento do monte galego. 

Neste sentido, salientou as bondades que teñen estas asociacións, dado que repercuten de xeito especialmente positivo na mellora da eficiencia económica e aumentan o acceso de recursos e subvencións. Ademais, promoven prácticas forestais máis responsables e sustentables.

Co fin de fomentar a creación e o apoio desta figura, lembrou que o Goberno autonómico convocou achegas específicas neste 2025 cun orzamento bianualizado de 1,4 millóns de euros. Seguindo esta liña, destacou que a anterior convocatoria permitiu duplicar o número de asociacións rexistradas, ata chegar ás 44 asociacións na actualidade.

Rendibilidade e xestión forestal sostible

O director xeral explicou que a finalidade destas agrupacións é promover a rendibilidade silvícola e promocionar a xestión forestal sostible; poñendo o foco na economía, o medioambiente e a sociedade. Ademais, ofrecen unha gran variedade de beneficios para os seus membros, xa que os propietarios poden acceder a asesoramento técnico especializado para mellorar as súas prácticas de xestión e aproveitamento forestal.

Ofrecen vantaxes tamén no momento de comercializar madeira de xeito conxunto, ao permitir obter mellores prezos e oportunidades de comercialización das que poderían chegar a acadarse de xeito individual. Asemade, facilitan a implementación de plans preventivos como a limpeza de biomasa forestal ou a creación de cortalumes, contribuíndo de xeito directo á prevención dos lumes forestais.

Recoñecemento dos montes veciñais en man común

Por outra banda, destacou o importante traballo que desenvolven os montes veciñais en man común, que fan aportacións de especial relevancia para a economía e o medioambiente. José Luis Chan sinalou que estas entidades actúan tamén como elementos de creación de emprego e xeración de riqueza. Ao mesmo tempo, a súa xestión repercute directamente na mellora do estado fitosanitario das masas forestais.