Sarria (Lugo), 1 de decembro de 2025

A Consellería do Medio Rural colabora co Concello de Sarria para a adquisición e instalación dun box de atordamento no matadoiro municipal.

O delegado territorial de Lugo, Javier Arias, visitou hoxe as instalacións, onde anunciou que a Xunta achegará 30.000 euros a través dun convenio coa administración local, co fin de facilitar a prestación do servizo nas mellores condicións posibles.

Os fondos permitirán ao Concello mercar e facer unha obra de instalación dun box de inmobilizado para atordado de vacún con empuxe e suxeición da cabeza que cumpra coa normativa vixente.

Arias subliñou que se trata dunha actuación prioritaria para a comarca de Sarria, onde o sector agrogandeiro é estratéxico. A zona rexistra unha intensa actividade agropecuaria  e alberga un número importante de salas de despece e pequenos talleres cárnicos, polo que o matadoiro é de grande interese para o sector.

Redución de custos

Esta medida forma parte da acción da Xunta para impulsar o sector primario da provincia, contribuíndo a que os gandeiros locais poidan comercializar os seus produtos en instalacións próximas e reducindo así os custos.

Arias incidiu en que o Goberno galego seguirá traballando para dinamizar a economía nos concellos rurais, con actuacións que contribúan á creación de emprego e ao asentamento de poboación.