Santiago de Compostela, 2 de febreiro de 2026

O presidente da Xunta, Alfonso Rueda, informou hoxe de que o Consello da Xunta deulle hoxe o visto e prace á posta en marcha, neste mes de febreiro, da Rede de psicoloxía clínica en atención primaria do Servizo Galego de Saúde coa incorporación de 21 novos profesionais.

Na procura de mellorar os coidados en saúde mental da poboación, co “compromiso de aumentar o número de psicólgos que traballan na Sanidade pública galega”, o Executivo realizará un investimento de máis 1,5 millóns de euros para dotar o primeiro nivel asistencial do sistema sanitario público galego con especialistas do ámbito da psicoloxía clínica, no modelo participaran de forma colaborativa co resto do equipo de atención primaria.

Entre os obxectivos que se perseguen coa Rede de psicólogos clínicos en atención primaria destacan: mellorar a abordaxe dos trastornos mentais comúns (depresión e ansiedade leve moderada e trastornos adaptativos), facilitando o acceso a intervencións psicolóxicas; e garantir unha atención integral, accesible e coordinada ao conxunto da poboación.

Así mesmo, mellorará a accesibilidade aos recursos específicos para o tratamento dos problemas de saúde mental e desenvolverá accións preventivas e de promoción no eido da saúde mental. Ademais, incidirá en optimizar a coordinación entre os servizos de atención primaria e os servizos especializados de psiquiatría das áreas sanitarias, dos que dependerá funcionalmente.

Segundo abondou o presidente, coa posta en marcha da rede, a área sanitaria da Coruña e Cee incorporará 5 psicólogos clínicos: nos centros de saúde de Abegondo/Curtis/Teixeiro; Miño/Sada; A Laracha/Cerceda; Os Rosales/Labañou; e Vimianzo/Cee). A área de Santiago de Compostela e Barbanza disporá de novos tres profesionais: nos centros de saúde de Muros; Melide/Arzúa; e Rianxo. A área de Vigo disporá de cinco novos psicólogos: no centro integral de saúde Olimpia Valencia; no centro de saúde de Navia; no de Ponteareas; en Redondela; e no de Moaña. A área sanitaria de Pontevedra e O Salnés incorporará un novo profesional, no centro de saúde Virxe Peregrina/Centro de Saúde de Sanxenxo.

A atención primaria da área sanitaria de Lugo, A Mariña e Monforte de Lemos contará con tres novos especialistas en saúde mental: en Viveiro, Sarria e no centro de saúde Praza de Ferrol de Lugo. Outros tres estarán na área de Ourense, Verín e o Barco de Valdeorras: nos centros de saúde Valle Inclán/Puente/O Carballiño; en Novoa-Santos/O Couto/Mariñamansa/Ribadavia; e no Barco de Valdeorras/Viana do Bolo). A área sanitaria de Ferrol sumará un psicólogo clínico no centro de saúde Fontenla Maristany.

Rueda sinalou que estas novas 21 incorporación triplican “o número de profesionais que agora mesmo están traballando”, sete profesionais nos centros de saúde de Fene/Narón (1), na área sanitaria de Ferrol; no centro de saúde do Milladoiro (1), na área sanitaria de Santiago de Compostela e Barbanza; nos centros de saúde Illas Canarias/Fingoi/Sarria/Vilalba (1), na área sanitaria de Lugo, A Mariña e Monforte de Lemos; nos centros de saúde de Ribadavia/O Carballiño (1), na área de Ourense, Verín e O Barco de Valdeorras; nos centros de saúde de San Roque (Vilagarcía)/Marín/A Parda (2), na área sanitaria de Pontevedra e O Salnés; e nos centros de saúde de Bembrive e Sárdoma, da área sanitaria de Vigo.

En total, o titular do Executivo galego sinalou que a atención primaria galega suma 28 psicólogos clínicos e avanza cara ao obxectivo de “seguir aumentando esta rede de psicólogos clínicos na atención primaria ata chegar a 50” antes do ano 2030, de acordo co progresivo incremento previsto de profesionais dispoñibles para a súa contratación

Con esta medida, o Goberno da Xunta segue a incrementar a carteira de servizos dos centros de saúde de Galicia co obxectivo de mellorar a detección, a avaliación e o tratamento dos trastornos mentais comúns da poboación.

Tamén se avanza nunha das liñas estratéxicas do novo Plan de Saúde Mental da Xunta que procura unha atención máis integral e coordinada.