Pontevedra, 29 de abril de 2026

O delegado territorial da Xunta en Pontevedra, Agustín Reguera, visitou esta mañá a Confederación Galega de Persoas con Discapacidade con motivo do desenvolvemento do seu Plan Integrado de Emprego (PIE), unha iniciativa orientada á mellora da empregabilidade das persoas participantes.

Este programa, cunha duración de 12 meses, está financiado pola Xunta de Galicia e permite o seguimento individualizado e a formación dun grupo de 100 persoas desempregadas con discapacidade, co obxectivo de facilitar a súa inserción no mercado laboral, especialmente no caso de colectivos con maiores dificultades de acceso ao emprego. Esta iniciativa é posible grazas a un investimento da Xunta de preto de 150.000 euros.

Durante a visita, o delegado territorial puxo en valor “o compromiso e a implicación da entidade no desenvolvemento de políticas activas de emprego, contribuíndo a xerar oportunidades reais para as persoas con discapacidade”.

Neste sentido, destacou tamén os resultados acadados en toda Galicia dende a creación deste programa subliñando os millares de participantes que conseguiron acceder a un posto de traballo grazas a esta iniciativa, o que evidencia a eficacia deste tipo de medidas.

Agustín Reguera aproveitou a ocasión para agradecer “o esforzo da Confederación Galega de Persoas con Discapacidade, así como a colaboración do tecido empresarial, fundamental para acadar os obxectivos de inserción laboral”.

Cabe lembrar que, en Galicia, a convocatoria de 2025 contou cun orzamento máis de 11,5 M€ , o que permitiu a posta en marcha máis de medio cento de Programas Integrados de Emprego durante un período de 12 meses, beneficiando a unhas 5.500 persoas en toda a comunidade.