Santiago de Compostela, 7 de maio de 2026

O director xeral da PAC e do Control da Cadea Alimentaria, Juan José Cerviño, participou na mañá de hoxe na inauguración das xornadas técnicas de Fondos Agrícolas 2026, organizadas polo Fondo Español de Garantía Agraria (FEGA). Durante a súa intervención, destacou o liderado de Galicia no sector primario, especialmente nos eidos leiteiro e cárnico, nos que a comunidade está consolidada como un referente no ámbito nacional e internacional.

Neste sentido, definiu Galicia como unha potencia láctea, que produce o 42 % do leite do país e que concentra máis da metade das explotacións leiteiras de toda España. Sinalou  que a comunidade se atopa entre as dez primeiras rexións europeas en produción de leite. En relación co sector cárnico, destacou que Galicia aporta aproximadamente o 1,5 % da produción europea, cunhas 94.000 toneladas anuais. Cerviño fixo tamén referencia á versatilidade do medio rural galego e mencionou outros sectores como o vitivinícola, a horta, a planta ornamental e a flor cortada, nos que Galicia tamén ocupa unha posición salientable.

O director xeral eloxiou o labor de xestión de pagos que leva a cabo o Fondo Galego de Garantía Agraria (Fogga), xa que é o ente que realiza todos os pagos dos fondos agrarios europeos, tanto FEAGA como Feader, na nosa comunidade autónoma. Este traballo permitiu mobilizar pagamentos por 407 millóns de euros o pasado exercicio financeiro, entre axudas directas ao sector e achegas ao desenvolvemento rural, unha cifra récord con respecto a anos anteriores.

Así mesmo, destacou o importante peso que o sector primario ten na economía galega, xa que sustenta milleiros de empregos e aporta un importante valor económico. Seguindo esta liña, puxo en valor as achegas da Política Agraria Común como unhas axudas clave para asegurar a sustentabilidade deste eido.

Así, con respecto á futura PAC post 2027, Juan José Cerviño incidiu na necesidade de defender unha PAC forte e ben dotada, baseada nunha arquitectura con fondos diferenciados que garanta as axudas directas e os fondos para o desenvolvemento rural.