Fene (A Coruña), 4 de xuño de 2026

A delegada territorial da Xunta en Ferrol, Martina Aneiros, visitou hoxe o Concello de Fene acompañada da directora territorial da Consellería de Medio Ambiente e Cambio Climático, Pilar Arias, e da alcaldesa do municipio, Sandra Permuy. Alí, Aneiros puido comprobar as actuacións realizadas no depósito de Vilar do Colo grazas ás achegas do Goberno galego para minimizar as perdas de auga.

O Concello foi beneficiario en 2025 destas subvencións destinadas a entidades locais, recibindo preto de 42.000 euros. Estes fondos serviron para sufragar a instalación dun sistema remoto de control, o cal permite coñecer en tempo real o nivel do depósito, ademais de parámetros como o pH, o cloro ou a temperatura da auga. O sistema inclúe tamén a xestión de avisos e o control automático dos niveis, o que mellora a capacidade de resposta a posibles incidencias.

Grazas a esta achega, o Concello renovou tamén os cadros eléctricos e a aparelaxe no depósito do Catalán e no bombeo de Lameiro, o que permitirá rexistrar con precisión os caudais e mellorar o control sobre o funcionamento das instalacións.

Aneiros destacou esta liña de axudas de Augas de Galicia, destinada aos concellos de menos de 20.000 habitantes, “coa que o Goberno galego promove unha transición enerxética limpa e equitativa mentres busca a mellora da eficiencia hídrica”, explicou.

No ámbito da Delegación Territorial foron seis os Concellos beneficiarios destas achegas cofinanciadas con fondos Feder, recibindo un total conxunto que supera os 214.000 euros. A representante autonómica aproveitou para recordar que esta liña de subvencións cobre o 100% do investimento das actuacións propostas, e apuntou que o prazo de solicitude da actual convocatoria, dotada cun orzamento de máis de 1,2 M€, está aberto ata o 29 de xuño ás 14,00 h.