Santiago de Compostela, 17 de xuño de 2026

O director xeral de Emerxencias e Interior, Santiago Villanueva, e o comisario do Xacobeo 2027, Marcos Gómez Román, abordaron hoxe no Monte do Gozo o dispositivo de seguridade previsto nos tres días de celebración do festival O Son do Camiño.

Desde mañá ata o sábado máis de 1.300 efectivos -unha media de 435 por cada xornada- velarán pola seguridade tanto no propio evento como na cidade de Santiago de Compostela ante o fluxo de persoas e vehículos que se vai producir. En concreto, forman parte do dispositivo case 150 axentes das forzas e corpos de seguridade, entre eles unha trintena de membros da Unidade de Policía Nacional Adscrita de Galicia (UPA), xunto con efectivos da Policía Nacional, Garda Civil de Tráfico e Policía Local de Santiago. A eles súmanse outros case 290 efectivos de emerxencias como voluntarios de Protección Civil ou bombeiros de Santiago, así como medios da Axencia Galega de Emerxencias (Axega), persoal de seguridade privada e persoal sanitario. Ademais, nos medios sanitarios previstos figuran un hospital de campaña, dúas ambulancias asistenciais, dúas unidades de soporte vital avanzado (SVA) ou UVI móbiles e seis técnicos de emerxencias sanitarias móbiles despregados con equipos de primeira intervención.

Responsables de todos estes servizos integraranse no Posto de Mando Avanzado (PMA) que se constituirá mañá para coordinar en cada xornada os fluxos de entrada e o cumprimento das medidas de seguridade no interior e no exterior do recinto no que se celebrará o festival co obxectivo de previr aglomeracións, ademais de actuar ante emerxencias sanitarias ou doutra índole que se poidan producir. Para levar a cabo estas actuacións, o dispositivo contará co apoio de cámaras de seguridade e control de tráfico nos accesos e na contorna e varios drons aéreos.

Santiago Villanueva incidiu na importancia da coordinación entre todos estes medios despregados que forman parte dos operativos habituais de eventos deste tipo. Así, por exemplo, haberá conexión e comunicación entre o Centro Integrado de Atención ás Emerxencias (CIAE) 112 Galicia, o centro de xestión de Tráfico e a Policía Local.