Santiago de Compostela, 17 de xuño de 2026

A Xunta avanza na simplificación da contratación pública para mellorar na súa eficiencia, calidade e transparencia. O director xeral de Simplificación administrativa e do Patrimonio da Consellería de Facenda e Administración Pública, José María Barreiro, participou hoxe nunha mesa redonda titulada A simplificación na contratación pública: control, burocracia e supervisión, dentro do III Congreso de Contratación Pública que se celebra estes días na Coruña.  

O director xeral debullou os avances realizados na Estratexia Galega de Contratación Pública Horizonte 2030, aprobada en xaneiro de 2026, para avanzar cara a unha contratación máis áxil, menos complexa e máis eficiente. Barreiro incidiu na necesidade de facelo desde todas as fases do procedemento, “desde a tramitación ata a execución dos contratos”.

A simplificación administrativa é “un instrumento clave” para mellorar a calidade e a eficacia dos procedementos, mantendo os principios de concorrencia, igualdade e publicidade. Por iso o Goberno galego a aborda cun enfoque integral que combina medidas normativas, organizativas e tecnolóxicas para eliminar cargas administrativas innecesarias, mellorar a eficiencia dos procedementos e facilitar a relación da cidadanía e das empresas coa Administración.

Medidas da Xunta

Entre as medidas impulsadas pola Xunta destacan a implantación xeneralizada da contratación electrónica, que permite “reducir erros e duplicidades”, así como a elaboración de modelos e ferramentas comúns que facilitan a tramitación e melloran a comprensión por parte das empresas.

Así mesmo, a Estratexia aposta pola planificación da contratación, a profesionalización dos xestores públicos e o impulso de mecanismos que fomenten a participación das pequenas e medianas empresas, reforzando así o tecido económico e a competencia nos procedementos.