Ourense, 23 de setembro de 2026

A directora da Axencia Galega de Innovación, Carmen Cotelo, e o delegado territorial da Xunta de Galicia en Ourense, Manuel Pardo,  abriron hoxe en Ourense a mesa de traballo para a elaboración do Plan Local de I+D+i na que participaron alcaldes, empresas e outras entidades vencelladas á I+G+i. O impulso á innovación local é unha prioridade estratéxica para Galicia, recollida como unha novidade e unha iniciativa de alto impacto no Plan Galego de I+D+i 2025-2027, e, por iso, a Consellería de Educación, Ciencia, Universidades e FP puxo en marcha este proceso participativo para definir este documento marco que servirá de referencia aos concellos para incentivar a innovación no ámbito local e contribuír así ao fortalecemento do noso ecosistema investigador.

Neste senso, a directora da Axencia Galega de Innovación, Carmen Cotelo, apuntou que a innovación non é exclusiva das grandes empresas, das universidades, dos centros tecnolóxicos ou das grandes cidades, senón que debe chegar a todo o territorio e o Plan local de I+D+i pretende facilitar aos concellos as ferramentas para innovar. As xornadas que se están a celebrar estes días nas catro provincias galegas perseguen, precisamente, definir conxuntamente esta folla de ruta, un documento práctico que incluirá modelos de gobernanza, instrumentos de innovación, casos de éxito que poidan ser replicables, fontes de financiamento e modelos de plans que cada concello poida adaptar á súa realidade.

Cotelo destacou que en Galicia xa hai moita innovación local en eidos como a mobilidade, a enerxía, os datos, os servizos sociais, o turismo, a vivenda, a sustentabilidade, a administración dixital ou o desenvolvemento rural, porque, aclarou,  innovar non significa necesariamente incorporar máis tecnoloxía senón buscar novas e mellores respostas aos problemas da cidadanía. A partir deste marco común, o Plan local de I+D+i avanzarase posteriormente na posta en marcha de plans locais piloto, adaptados ás necesidades concretas dos municipios. Partindo dun diagnóstico e identificación dos seus retos, establecerán prioridades e actuacións, vías de financiamento, colaboracións e mecanismos de seguimento.

Próximos pasos: un congreso nacional e un premio

Este proceso participativo de elaboración do Plan local de I+D+i comezou hai un ano, en decembro de 2025, coa xornada “Cara á transformación municipal: Plans locais de I+D+i”, na que participaron máis de 130 representantes de entidades locais, deputacións, grupos de acción rural e axentes do ecosistema innovador. Esta cita permitiu escoitar directamente aos responsables locais e coñecer experiencias que xa se están desenvolvendo.

Ao longo destes meses foise avanzando noutras direccións, en estreita colaboración coa FEGAMP. Estas mesas provinciais, que se celebrarán daquí ao venres, son unha nova peza neste proceso, que permitirán incorporar a visión das persoas que coñecen de primeira man os problemas e as oportunidades do territorio. Así, mañá tócalle o turno a Lugo e o venres á Coruña.

Os vindeiros pasos son a celebración os vindeiros 3 e 4 de decembro en Santiago de Compostela do I Congreso Nacional de Innovación Local, que aspira a converterse nun punto de encontro entre administracións locais de toda España para compartir experiencias, coñecementos e boas prácticas. No marco deste congreso convocamos tamén o Premio á Innovación Local, para dar visibilidade ás boas iniciativas que xa existen nos concellos, con tres categorías segundo o tamaño dos concellos: ata 10.000 habitantes, entre 10.000 e 50.000 e máis de 50.000 habitantes, cuxo prazo para presentar candidaturas remata o 5 de outubro.