Tomiño (Pontevedra), 23 de setembro de 2026

O delegado territorial da Xunta en Pontevedra, Pablo Fernández, visitou esta mañá os Colexios Pintor Antonio Fernández e Plurilingüe de Tebra, no concello de Tomiño, para comprobar o resultado das obras de mellora executadas recentemente nos dous centros educativos, cun investimento conxunto superior aos 30.000 euros. Ademais, destináronse 40.000 euros á acometida eléctrica do Instituto Antón Alonso Ríos.

No CEIP Pintor Antonio Fernández destináronse máis de 13.000 euros á substitución da cuberta do patio, mentres que no CEIP Plurilingüe de Tebra o investimento superou os 17.000 euros e permitiu reformar a soleira, evitando así os charcos e buratos que se creaban no chan e que dificultaban o xogo dos pequenos. Estas intervencións permiten seguir adecuando os espazos educativos ás necesidades do alumnado e de toda a comunidade educativa en xeral.

O delegado territorial destacou o compromiso da Xunta coa mellora continua dos centros educativos, cunha aposta por unhas instalacións máis confortables, seguras e adaptadas ás necesidades de alumnos e docentes. “Investir nos centros educativos é tamén investir na calidade do ensino e no benestar de toda a comunidade educativa”, sinalou Pablo Fernández.

Durante a visita, o delegado puido coñecer de primeira man o resultado dos traballos e trasladar o compromiso da Xunta de continuar colaborando cos centros e cos concellos para atender as necesidades de mantemento e mellora das infraestruturas educativas. Ademais, Fernández aproveitou a visita para poñer en valor o feito de que a Xunta xestiona todos os comedores escolares do concello de Tomiño.