Madrid, 29 de setembro de 2026

A directora xeral de Estratexia Industrial e Solo Empresarial, Margarita Ardao, destacou esta mañá en Madrid as fortalezas de Galicia para posicionarse nunha industria estratéxica e cun grande potencial de crecemento como é a da defensa. Nesta sentido, puxo en valor o apoio e acompañamento que está a facer o Goberno galego a aquelas empresas do sector que deciden incorporarse nestes novos nichos de mercado a través da Iniciativa Estratéxica en Seguridade, Defensa e Aeroespazo (Iesda).

Ardao participou na mesa redonda Regional Defense celebrada no marco da nova edición Eudis Madrid Bootcamp para analizar o papel clave que desempeñan as comunidades autónomas no fortalecemento da base industrial de defensa, na atracción de investimento, o desenvolvemento de infraestruturas e a integración das capacidades rexionais na cadea de valor europea.

Precisamente, no marco da Iesda, a Xunta lanzou unha convocatoria para seleccionar novos socios estratéxicos e tecnolóxicos para o desenvolvemento de tecnoloxías duais nos ámbitos da seguridade, a defensa e o aeroespazo. A iniciativa, que se desenvolverá a través da fórmula da Compra Pública Precomercial, terá unha partida inicial de 40 millóns de euros e mantén aberto o prazo para presentar solicitudes de participación ata mañá, 30 de setembro. “Con esta actuación queremos que o coñecemento quede no territorio, que as empresas galegas entren nas cadeas de subministración e que cada investimento deixe detrás capacidade produtiva permanente”, apuntou.