Santiago de Compostela, 5 de outubro de 2026

A directora xeral de Mobilidade, Judit Fontela, participou hoxe na xornada de debate sobre a nova mobilidade en Galicia organizada polo Consello Económico e Social de Galicia, onde defendeu a necesidade de seguir avanzando cara a unha mobilidade sostible, eficiente e vertebradora do territorio. A directora xeral afondou nas diferentes medidas impulsadas polo Goberno galego con este obxectivo, entre as que destacou o Plan de Transporte Público de Galicia, a Plataforma Galega de Mobilidade 4.0 MoBT, as diferentes bonificacións ou as estacións intermodais, entre outras.

Segundo sinalou Judit Fontela, o Plan de Transporte Publico de Galicia permite darlle resposta a un dos grandes retos da mobilidade na comunidade, o de garantir o acceso ao transporte público tamén nas zonas rurais e dispersas, onde a baixa demanda fai necesario buscar fórmulas máis eficientes e adaptadas ao territorio. Nesta liña, referiuse á posta en marcha do transporte integrado e do transporte baixo demanda, como modelos para “optimizar os recursos, mellorar a eficiencia ambiental e ampliar a cobertura garantindo alternativas de mobilidade tamén para as persoas que viven en zonas máis afastadas dos núcleos urbanos”.

A aposta pola modernización tecnolóxica e a intermodalidade é outro dos eixes do Goberno galego. Neste marco de acción naceu MoBT, “un novo ecosistema de mobilidade que integra un portal web, unha aplicación para dispositivos móbiles e unha nova tarxeta co obxectivo de modernizar os medios de pago e integrar os diferentes servizos e solucións vinculados ao transporte público de Galicia”, apuntou a directora xeral.

Por outra banda, neste marco de modernización e mellora do transporte público, o Goberno galego tamén puxo o foco en fomentar o seu uso entre a cidadanía e facilitar o seu acceso. Para a directora xeral de Mobilidade, o impulso ao longo dos últimos anos das diferentes bonificacións e descontos contribúe a facer do transporte público “unha opción cada vez máis atractiva, accesible e económica”. Como casos salientables destacou a Tarxeta Xente Nova, con preto de 132.000 activas, e a Tarifa+65, con máis de 150.000. Só entre xaneiro e xullo deste ano, o importe das bonificacións para ambas sumou case sete millóns de euros.

Aposta pola intermodalidade

Xa no eido da intermodalidade, Judit Fontela referiuse á execución das terminais de autobuses, que lle permitirá a Galicia contar o vindeiro ano con seis estacións intermodais funcionando, xa que ás de Santiago de Compostela, Pontevedra, Vigo e Ourense se sumarán as da Coruña e Lugo. Ademais, “a Xunta ten previsto avanzar na área intermodal de Ferrol se o Goberno central responde ás demandas autonómicas”, engadiu.

Este conxunto de medidas enmárcanse na Estratexia Galega de Mobilidade Sostible, a folla de ruta deseñada pola Xunta para transformar o modelo de mobilidade en Galicia e avanzar cara a unha maior funcionalidade, sostibilidade e seguridade, apoiándose para iso na innovación tecnolóxica. Aprobada en 2024, integra 99 actuacións dotadas con 420 millóns de euros con 2050 como horizonte. Entre estas actuacións, Judit Fontela sinalou tamén a mellora da accesibilidade e conectividade das paradas de autobús e a execución de Infraestruturas que fomenten os desprazamentos non motorizados nos ámbitos urbanos e metropolitanos, como aparcadoiros disuasorios ou sendas peonís e ciclistas.