Santiago de Compostela, 5 de outubro de 2026

A conselleira de Medio Ambiente e Cambio Climático, Ángeles Vázquez, e o alcalde de Oroso, Alexánder Doval, acordaron hoxe a ampliación da rede de abastecemento municipal en Vilacide de Arriba.

A conselleira explicoulle ao alcalde que Augas de Galicia xa avaliou o proxecto presentado polo Concello e determinou que cumpre os parámetros técnico-legais necesarios, pero subliñou que o inicio da actuación está supeditado a dispor dos correspondentes informes de Carreteras del Estado e da Deputación Provincial da Coruña para poder incluír estas obras no presente exercicio orzamentario. De feito, segundo indicou o alcalde, a solicitude ao respecto desta cuestión fíxose o pasado mes de maio.

Ángeles Vázquez insistiu no compromiso da Consellería de Medio Ambiente e Cambio Climático de apoiar os concellos para acometer actuacións hidráulicas que pola súa complexidade ou polo seu custo económico resultarían difíciles de acometer exclusivamente con recursos municipais.

Ademais, a conselleira incidiu en que investir en infraestruturas hidráulicas significa mellorar os servizos públicos, ao dotar á veciñanza dun servizo de maior calidade, protexer os recursos hídricos e avanzar cara a un territorio máis sostible.