Vigo, 8 de outubro de 2026

A Consellería de Educación vén de lanzar a primeira convocatoria de Medrando entre culturas, un novo programa piloto para favorecer a inclusión do alumnado estranxeiro no ensino. Así o explicou a directora xeral de Ordenación e Innovación Educativa, Judith Fernández, nunha visita ao Colexio Plurilingüe O Pombal, en Vigo, onde subliñou que se trata dunha iniciativa voluntaria por parte dos centros, que dispoñen de prazo ata o 23 deste mes para presentar un proxecto específico de inclusión do alumnado de orixe estranxeiro, fomentando a eliminación de barreiras culturais dentro do colexio. 

O obxectivo desta iniciativa, que se enmarca no Programa galego de acollida e apoio ao alumnado estranxeiro, é crear unha contorna escolar na que a diversidade se perciba como un valor. Promoverase a participación activa de todo o alumnado e das súas familias para compartir coñecementos, costumes e linguas, á vez que se desenvolven habilidades sociais, emocionais e culturais para enriquecer a convivencia.

O programa vai dirixido a todos os centros públicos de infantil, primaria e secundaria, que contarán co asesoramento da Consellería. Educación escollerá os 40 centros de maior puntuación segundo os baremos establecidos na convocatoria, e os traballos resultantes poderán divulgarse como exemplo de boas prácticas e converterse en modelos de referencia de organización e xestión. Cómpre resaltar que esta iniciativa se enmarca nun contexto de crecemento deste alumnado nas aulas, que pasou do 2,6% de hai unha década a preto do 7% actual, o que supón tamén un reto para a súa integración.

Novas aulas de acollida

A directora xeral de Ordenación e Innovación educativa explicou que esta nova convocatoria súmase a outras iniciativas que está desenvolvendo a Xunta de Galicia para asegurar a mellor atención educativa ao alumnado doutros países nas aulas galegas.

Dentro do novo Marco para o impulso educativo, unha das liñas estratéxicas é o reforzo da igualdade de oportunidades. Nese sentido, porase en marcha un programa piloto de aulas de acollida para alumnado de incorporación tardía. Isto é, un recurso temporal de apoio para o estudantado procedente do estranxeiro que se incorpore á Educación Secundaria unha vez iniciado o curso e presente dificultades significativas de competencia lingüística ou desfase relevante nas aprendizaxes.

Segundo explicou Fernández, estas aulas estarán enfocadas a facilitar unha acollida educativa “intensiva e personalizada” centrada, especialmente, na adquisición de competencias lingüísticas, no reforzo das aprendizaxes fundamentais e no coñecemento do novo contexto escolar. O obxectivo é “favorecer a incorporación progresiva e o antes posible do alumno á dinámica ordinaria da aula e do centro”, abondou.

Galicia conta, desde 2024, co Programa galego de acollida e apoio educativo ao alumnado estranxeiro, unha das accións recollidas no Plan MEGA de mellora educativa de Galicia, con accións específicas de inclusión para estes estudantes nos centros educativos.