Santiago de Compostela, 15 de outubro de 2026

O director xeral de Pesca, Acuicultura e Innovación Tecnolóxica, Isaac Rosón, mantivo unha xuntanza co coordinador do Seprona en Galicia e comandante da Garda Civil, Jesús Aneiros, co gallo de coordinar accións na defensa dos recursos acuáticos e mariñeiros da nosa comunidade. Durante a reunión, ambas as partes amosaron a súa total disposición mutua para optimizar esforzos na vixilancia, o troco de información e o estrito cumprimento da normativa vixente.

Neste marco, Isaac Rosón puxo especialmente en valor o labor estratéxico e o despregamento continuo que desenvolve sobre o terreo o Servizo de Gardacostas de Galicia, clave tanto na prevención e loita contra o furtivismo como na preservación dos ecosistemas litorais. O director xeral reiterou que a suma de capacidades entre os medios de Gardacostas e os da Garda Civil é a mellor garantía para blindar a sostibilidade do medio mariño, garantir a seguridade nas nosas rías e protexer a actividade dos profesionais do mar en Galicia.