Vigo, 12 de novembro de 2026

O conselleiro de Presidencia, Xustiza e Deportes, Diego Calvo, participou hoxe na inauguración do Foro Eurorrexión Galicia-Norte de Portugal: Polo de competitividade, organizado pola Agrupación Europea de Cooperación Territorial (AECT) da Eurorrexión Galicia-Norte de Portugal. Durante a súa intervención,  destacou o potencial económico deste territorio e a importancia de reforzar a cooperación e as conexións entre ambos os territorios para aumentar a súa competitividade e avanzar en sectores estratéxicos de futuro.

O encontro, celebrado en Vigo, foi clausurado polo director xeral de Relacións Exteriores e coa Unión Europea, Jesús Gamallo, e pola directora da  AECT da Eurorrexión Galicia-Norte de Portugal, Aldara Vázquez. Asistiron tamén ao foro a delegada da Xunta en Vigo, Ana Ortiz, e o director xeral de Cohesión e Fondos Europeos, Ángel Tarrío.

Diego Calvo destacou o potencial económico da Eurorrexión Galicia-Norte de Portugal e a importancia de reforzar a cooperación e as conexións entre ambos os territorios para aumentar a súa competitividade e avanzar en sectores estratéxicos de futuro. Lembrou que se trata da maior área transfronteiriza de Europa, cunha importante capacidade industrial, empresarial e exportadora, e que Galicia e o norte de Portugal comparten unha economía con sectores consolidados e grandes posibilidades de crecemento. Nesta liña, sinalou que traballar xuntos permite aproveitar mellor os recursos, abrir novas oportunidades para as empresas e avanzar en ámbitos como a intelixencia artificial, a biotecnoloxía e as tecnoloxías dixitais.

O conselleiro incidiu en que para aproveitar este potencial é fundamental mellorar a conectividade entre Galicia e Portugal, tanto a través das infraestruturas de transporte como das conexións loxísticas e dixitais. Neste sentido, destacou a importancia de avanzar na conexión ferroviaria de alta velocidade, mellorar as relacións entre os portos e contar cunha rede de infraestruturas que facilite o movemento de persoas e mercadorías e favoreza a actividade económica.

Tamén defendeu unha maior colaboración entre as administracións, as empresas e as universidades para achegar a innovación ao tecido produtivo e desenvolver novos proxectos conxuntos. O obxectivo, sinalou, debe ser que a fronteira deixe de ser unha limitación e se converta nunha vantaxe para as empresas galegas e portuguesas.

Tres primeiros pasos para unha alianza económica

O foro celebrado hoxe enmárcase na Visión Estratéxica da AECT Galicia–Norte de Portugal 2026-2028, que identifica o fortalecemento das relacións económicas e empresariais como unha das prioridades para o futuro da cooperación transfronteiriza.

Para avanzar neste obxectivo, a AECT propón tres liñas de actuación. A primeira pasa por crear un grupo de traballo en materia de competitividade que reúna as administracións, as empresas, as universidades, os centros de coñecemento e a sociedade civil, co fin de identificar necesidades, detectar complementariedades entre os sectores produtivos e definir unha axenda común.

A segunda liña céntrase en conectar os tecidos empresariais de Galicia e do Norte de Portugal mediante encontros sectoriais que faciliten o contacto directo entre compañías, a creación de alianzas estratéxicas, o desenvolvemento de proxectos conxuntos e a apertura de novas oportunidades de negocio, tamén en mercados internacionais.

Por último, a terceira proposta consiste en preparar unha primeira misión comercial conxunta en sectores estratéxicos. Para iso, elaborarase unha folla de ruta que permita identificar posibles ámbitos de colaboración e mercados nos que a cooperación entre empresas de ambos os territorios poida xerar maior valor engadido.

Máis integración, competitividade e innovación

No foro tamén se abordaron outros tres ámbitos clave para o desenvolvemento económico da Eurorrexión: as tecnoloxías emerxentes, a colaboración público-privada en materia de innovación e as infraestruturas estratéxicas. Cuestións que permitirán mellorar a conexión entre os ecosistemas empresariais, científicos e tecnolóxicos de Galicia e do Norte de Portugal e aproveitar as oportunidades que ofrecen os novos sectores produtivos.

As propostas recollidas na Visión Estratéxica da AECT constitúen os primeiros pasos para avanzar cara a un modelo de cooperación económica máis estreito, que vaia máis alá da coordinación entre administracións e favoreza unha relación directa entre empresas, universidades e centros de coñecemento de ambos os territorios.

O propósito é sentar as bases dun Polo de Competitividade Galicia–Norte de Portugal, capaz de sumar capacidades, atraer investimento, favorecer a innovación e xerar novas oportunidades de crecemento e emprego.

Deste xeito, a proximidade xeográfica, histórica, cultural e económica entre Galicia e o Norte de Portugal pode converterse nunha vantaxe competitiva para reforzar a posición da Eurorrexión en Europa e ampliar a súa proxección internacional.