A Xunta destina máis de 1,4 millóns de euros a financiar a contratación de 122 perceptores da Risga nos concellos da área territorial de Vigo

A delegada territorial da Xunta en Vigo informou hoxe que a Consellería de Emprego e Igualdade vén de resolver a orde de axudas a entidades locais para favorecer a inserción laboral de persoas en situación vulnerable, destinando máis de 1,4 millóns de euros á contratación de 122 persoas perceptoras da Risga (Renda de Integración Social de Galicia), que se encargarán de realizar obras ou servizos de interese xeral nos seus respectivos municipios.

A distribución destas achegas na comarca viguesa é a seguinte:

A representante autonómica explicou que esta medida busca favorecer a inserción laboral destas persoas co obxecto de proporcionarlles a experiencia e práctica profesional necesarias.

O importe da subvención que se concede ás entidades beneficiarias será o equivalente ao necesario para sufragar os custos salariais totais, incluída a cotización empresarial á Seguridade Social, durante un período de nove meses.

Fernández-Tapias incidiu en que esta medida ten como obxectivo conseguir a mellora da empregabilidade dos colectivos máis vulnerables e completa outras iniciativas da Xunta para favorecer a contratación laboral por parte dos concellos galegos.

Así, referiuse a outras liñas de axudas que o Goberno galego resolveu recentemente, como as do programa Aprol Rural, que destina 197.000 euros para facilitar a contratación de 12 persoas desempregadas que levarán a cabo tarefas de prevención de incendios en 14 concellos da área de Vigo; e os apoios por valor de 71.000 euros para cubrir 24 postos de socorristas que vixiarán as praias e piscinas de seis municipios da comarca viguesa durante o verán.

Asemade, a Xunta de Galicia financia con 1,8 millóns de euros cinco obradoiros de emprego de Garantía Xuvenil na área territorial de Vigo para formar a 80 mozos e mozas nos concellos de Vigo (2), Redondela, Moaña e o Val Miñor.