Rosa Quintana destaca a alianza dos produtos do mar e do agro coa gastronomía a prol de causas solidarias como a loita contra o cancro

A conselleira do Mar, Rosa Quintana, destacou hoxe o papel da gastronomía en causas solidarias como a loita contra o cancro, algo que se reflicte, sinalou, en eventos como 10 bocados solidarios, que se celebra hoxe no Hostal dos Reis Católicos. Grazas a iniciativas coma esta, subliñou a titular de Mar, “contribuímos a seguir poñendo nome e apelidos a todos os valentes que diariamente perseveran, apoiados polas súas familias e un incrible equipo sanitario, para vencer a súa batalla persoal máis dura”.
Así o sinalou durante o evento 10 bocados solidarios, unha acción promovida polo chef galego Kike Piñeiro e polo colombiano Charlie Otero con motivo da celebración do Día Mundial Contra o Cancro -o pasado 5 de febreiro- e co obxectivo de recadar fondos en beneficio da Asociación Española Contra o Cancro (AECC). Esta cita, subliñou Rosa Quintana, é unha mostra “de que cando dúas forzas se asocian, se multiplican”. Forzas, especificou, como a solidariedade entre Colombia e Galicia a través da cociña e o compromiso coa loita contra o cancro.
A Xunta colabora con esta iniciativa solidaria aportando diversos produtos galegos do agro e do mar con indicativo de calidade diferenciada. Estes produtos son transformados en tapas solidarias polas 11 cociñeiras e cociñeiros que participan no evento e poden ser degustados polos asistentes que previamente aboaron a entrada. Todos os fondos recadados en 10 bocados solidarios irán dirixidos integramente á AECC.
En relación aos organizadores e participantes no evento, Rosa Quintana puxo en valor o seu altruísmo e xenerosidade “por estar ao lado de quen máis o necesita” e apelou a actuar colectivamente para seguir axudando en causas como a loita contra o cancro.

O mar e o agro en bocados solidarios

Entre os profesionais que forman parte desta iniciativa están Charlie Otero e Estefanía Serrano, que elaboran unha tapa con polbo galego do selo pescadeRías e Castaña de Galicia; Kike Piñeiro e Eloy Cancela, que traballan con ourizo de mar de pescadeRías e queixo de Arzúa, e Diego Domínguez, Maica Couto e Marcos Domínguez, que cociñan con voandeira de pescadeRías e queixo de San Simón da Costa.
Pola súa banda, Luis Romaní e Jorge Gago conforman unha tapa con Ternera Gallega e Mexillón de Galicia, mentres Álvaro Victoriano e Gerson Iglesias contan con produtos de Mel de Galicia, queixo do Cebreiro e Fabas de Lourenzá. Para acompañar estas tapas, tamén hai a disposición dos que contribúan á causa Pan de Cea e Tarta de Santiago. Ademais da degustación, o evento tamén conta coa actuación da cantante galega Najla Shami.