A Xunta recibe ofertas para adquirir máis de 66.000 m2 en 6 parques empresariais cun investimento de 5 M€

A Xunta acaba de iniciar a análise para a adxudicación en 6 parques empresariais de 22 parcelas, que suman máis de 66.000 metros cadrados.

O pasado 30 de marzo pechou o prazo para a presentación de propostas para a adquisición de solo empresarial neste polígono no marco do concurso convocado en febreiro, polo que agora o Instituto Galego da Vivenda e Solo está a analizar as ofertas presentadas.

En total, as parcelas polas que existe interese suporían un investimento de 5 millóns de euros, xa aplicada a bonificación do 30% ou do 50%, segundo o polígono.

Recibíronse ofertas para a adquisición de 43.887 m² (13 parcelas) no parque das Gándaras, en Lugo; 11.436,50 m² (5 parcelas) na Sionlla, en Santiago de Compostela; 5.471 m² (1 parcela) en Morás, en Arteixo; 2.592 m² (1 parcela) en Xinzo de Limia; 1.972 m² (1 parcela) en Carballo; e 990 m² (1 parcela) en Ortigueira.

Cómpre lembrar que no concurso deste ano dispuxéronse catro modalidades de compra das parcelas: adxudicación con prezo bonificado, en dereito de superficie, en alugueiro e en compravenda con pago aprazado, esta última por primeira vez.

Tras a formalización dos contratos de adxudicación do concurso, o solo dispoñible na Sionlla e no resto de parques poderá adquirirse nas mesmas condicións da última convocatoria deste procedemento.