A Consellería do Mar destaca a importancia de promover o consumo de peixes e mariscos en comedores colectivos e de conquistar o padal dos máis novos

A Coruña, 9 de abril de 2024

O director xeral de Pesca, Acuicultura e Innovación Tecnolóxica, Antonio Basanta, participou este luns na mesa redonda Comer ben en comedores colectivos sostibles. Garantías de calidade e boas prácticas dos produtos que se celebrou no Galicia Fórum Gastronómico. Acompañado por José Luis Cabarcos, director da Axencia Galega da Calidade Alimentaria (Agacal), Manuela Oviedo, xerente do GALP Costa Sostible e moderados por Rocío García Carregal, secretaria de Slow Food Compostela, abordaron as estratexias para promover o consumo de produtos de quilómetro cero e unha dieta máis saudable. 

A Consellería do Mar puxo en valor pescadeRías, selo de identidade para os peixes e mariscos procedentes da frota artesanal, exemplos de frescura, calidade e proximidade. Antonio Basanta apostou por intensificar o consumo xeral de produtos do mar en comedores como os escolares, universitarios ou nas residencias de maiores e sinalou a importancia de promover estas alimentos entre os máis novos, con campañas como Ti si que es un bo peixe ou Fai click ao teu bocata. Na xornada de hoxe no Galicia Fórum Gastronómico houbo no stand da Consellería dúas degustacións da propia pescadeRías, outra de conservas con Cata a lata de Anfaco e unha máis de Mexillón de Galicia.