A Xunta financia con máis de 200.000 euros os programas de conciliación familiar do Condado-Paradanta
O delegado territorial visitou os programas de conciliación de Mondariz e Mondariz-Balneario e agradeceu o traballo de todos os involucrados
A consellería de Política Social e Igualdade inviste un total de 1,2 millóns nos programas de conciliación dos concellos da provincia de Pontevedra
Mondariz (Pontevedra), 29 de xullo de 2024
O delegado territorial da Xunta en Pontevedra, Agustín Reguera, visitou esta mañá os programas de conciliación dos concellos de Mondariz e Mondariz-Balneario, que están financiados coas subvencións ás entidades locais para a promoción da igualdade.
Trátase dunha aposta da Consellería de Política Social e Igualdade que pretende crear un espazo de xogo, diversión e aprendizaxe para os nenos e nenas galegas, á vez que fomenta a conciliación familiar.
Neste sentido, a consellería inviste preto de 1,2 millóns de euros nos programas de conciliación da provincia, dos cales, máis de 200.000 corresponden aos concellos do Condado-Paradanta. Entre os concellos beneficiados por estas axudas atópase, ademais dos visitados esta mañá polo delegado, Ponteareas.
En total, son 25 os concellos da provincia de Pontevedra que se benefician destas axudas e que dan servizo a millares de familias. O delegado territorial aproveitou a ocasión para agradecer o traballo de todos os “monitores e monitoras que se esforzan por organizar un verán inesquecible para todos os nenos e nenas” e asegurou que estas iniciativas supoñen “unha aposta cada vez máis necesaria pola conciliación familiar”.
Imaxes relacionadas
