Pontevedra, 4 de novembro de 2024

O delegado territorial da Xunta en Pontevedra, Agustín Reguera, recibiu ao alcalde de Cerdedo-Cotobade, Jorge Cubela, que se achegou ao edificio administrativo da Xunta en Pontevedra para manter unha reunión de traballo co director territorial de Educación, César Pérez, e cun técnico da dirección territorial de presidencia.

Durante a reunión o alcalde expuxo algúns dos retos que enfronta o concello de Cerdedo-Cotobade en cuanto á mobilidade e as infraestruturas viarias. Reguera asegurou que seguirá traballando de forma conxunta e coordinada para estudar as mellores vías de dar solución ás demandas dos veciños e veciñas.

Neste sentido, o delegado territorial quixo destacar o labor de Cubela e a súa “determinación por mellorar a vida dos seus veciños e veciñas”. Reguera rematou a reunión lembrando que as direccións territoriais da Xunta, así como a propia delegación, están á disposición de todos aqueles alcaldes e alcaldesas que o precisen.