Sanxenxo (Pontevedra), 28 de novembro de 2024

A conselleira de Política Social e Igualdade, Fabiola García, visitou esta mañá o centro de día municipal de Sanxenxo acompañada do alcalde do municipio, Telmo Martín. O motivo da visita foi participar no vixésimo aniversario deste centro de atención diúrna, unha celebración á que asistiron numerosos usuarios e os seus familiares.

Na súa intervención, a conselleira felicitou ao centro e ao seu persoal por “ofrecer día a día un servizo estritamente pensado para garantir o benestar das persoas maiores” e destacou que este centro leva xa “dúas décadas sendo exemplo dunha atención integral e plural aos maiores do concello e da comarca”.

No centro de día de Sanxenxo ofrécese atención, terapias e coidados durante oito horas ao día a preto de 80 maiores desta localidade e da súa comarca. Na súa oferta, inclúe múltiples servizos destinados ás persoas usuarias como poden ser terapia ocupacional, educación social, fisioterapia, animación sociocultural, enfermería, comedor ou transporte.

A conselleira puxo en valor os centros de atención diúrna como un servizo que permite garantir o benestar e o coidado das persoas maiores ao tempo que seguen vivindo nas súas casas. Neste sentido, apostou por seguir ampliando a carteira de servizos para darlle aos maiores a posibilidade de decidir onde e como pasar esta etapa das súas vidas.

Fabiola García, que puido coñecer a usuarios do centro e aos seus familiares, desexou que estes vinte anos de historia “sexan só o inicio dun longo camiño” e que o centro de día de Sanxenxo “siga sendo o que xa é: unha segunda casa para os seus usuarios”.