A Xunta destina máis de 134.000 euros á sustentabilidade das entidades asociativas do sector pesqueiro da provincia
O delegado territorial visitou a Confraría de Lourizán que recibiu unha achega que supera os 13.000 euros
En total beneficiáronse destas axudas 23 confrarías e asociacións da provincia de Pontevedra, ademais da Federación Provincial de Confrarías de Pescadores
Pontevedra, 2 de decembro de 2024
O delegado territorial da Xunta en Pontevedra, Agustín Reguera, visitou esta mañá a Confraría de Lourizán con motivo das axudas de carácter extraordinario ás entidades asociativas do sector pesqueiro destinadas a garantir a súa sustentabilidade.
Acompañado pola directora territorial de Mar, María Elena Suárez, o delegado destacou a importancia dun “sector clave” para Galicia e lembrou que a Xunta está “sempre pendente das necesidades e requirimentos dos mariñeiros e mariscadores”.
Cabe destacar que Confraría de Lourizán recibiu unha achega que supera os 13.000 euros ao abeiro desta liña de axudas. Na provincia de Pontevedra foron 23 as confrarías e asociacións que se beneficiaron desta convocatoria, ás cales hai que sumarlle a achega destinada á Federación de Confrarías de Pescadores de Pontevedra. En total a consellería do Mar destinou máis de 134.000 euros ás entidades da provincia.
Ademais da de Lourizán, destacan na área de influencia de Pontevedra e O Morrazo as confrarías de Bueu; Vilaboa; Pontevedra; Moaña; Cangas; Raxó; Marín; e Aldán – O Hío.
Reguera aproveitou a visita para desexar “o maior dos éxitos a todo o sector, moi especialmente nesta campaña de Nadal que é de vital importancia para a prosperidade de todos os traballadores e traballadoras do Mar”.
Imaxes relacionadas
