Santiago de Compostela, 5 de decembro de 2024

A Xunta activa desde o luns 9 de decembro catro servizos de autobús ao día entre o centro urbano de Marín e o aparcadoiro disuasorio da parroquia do Campo. Conéctase así co transporte público a área de estacionamento habilitada en xullo preto do núcleo de Ameal,  e dotada xa cunha marquesiña para favorecer os enlaces co autobús interurbano.

Os traslados en autobús entre o aparcadoiro disuasorio e Marín realizarase en dúas liñas, que ofrecen cada unha un servizo de ida e outro de volta de luns a venres laborables. Os servizos saíran do aparcadoiro cara a Marín ás 9,30 horas e ás 10,00 horas e desde Marín, de regreso, ás 12,00 horas e ás 13,00 horas. A nova liña contará con seis paradas: Marín, R/ José Del Río, Moreiras, Porteliña, Castro e Marín (O Campo aparcadoiro).

Ademais, a liña que xa se atopaba operativa entre Marín e a localidade de Seixo adaptou o seu itinerario engadindo once paradas: Vista Alegre, Pardavila, Cantera, Pazo Cadro, Silvestre, Troncosa, Allariz, Iglesario, Cernello, Torre, Marín (O Campo aparcadoiro) e CEIP de Seixo.

A iniciativa enmárcase na aposta da Xunta pola mobilidade sostible a través do fomento do uso do coche compartido e do transporte público, facilitando un espazo onde deixar o automóbil de xeito cómodo e seguro para desprazarse despois desde os núcleos rurais da contorna ao centro urbano compartindo coche ou en autobús.

Así, o recinto do novo aparcadoiro disuasorio ocupa 3.000 metros cadrados de superficie con 81 prazas habilitadas, das que tres están reservadas para persoas con mobilidade reducida e outras tres para vehículos eléctricos. A zona dotouse ademais de alumeado e videovixilancia, e humanizouse cunha franxa central peonil, unha franxa verde central con arborado e áreas axardinadas. Estas actuacións forman parte dos proxectos promovidos pola Xunta ao abeiro dos fondos europeos do Mecanismo de Recuperación e Resiliencia Next Generation UE.

Cómpre lembrar tamén que as persoas usuarias das liñas de transporte interurbano poden beneficiarse de diversas vantaxes e bonificacións impulsadas pola Xunta a través da Tarxeta de Mobilidade de Galicia (TMG), da Tarxeta Xente Nova (TXN) para menores de 21 anos e da tarifa +65 para maiores de 65 anos.