Noia (A Coruña), 17 de xaneiro de 2025

O conselleiro do Mar, Alfonso Villares realizou unha visita á lonxa de Testal, no municipio coruñés de Noia, onde destacou que a Xunta ten concedidas axudas por valor de máis de 516 mil euros ao sector pesqueiro do municipio que permitirán acometer actuacións esencias para avanzar na sostibilidade e competitividade da actividade pesqueira e marisqueira da zona.

O responsable autonómico, acompañado pola directora xeral de Desenvolvemento Pesqueiro, Marta Villaverde, sinalou que entre os proxectos que acadan financiación autonómica está Naturanoia, que ten como finalidade a redución os impactos negativos ou contribuír aos impactos positivos sobre o medio ambiente. Outro é Formanoia 3 que promove as condicións para uns sectores da pesca, acuicultura e transformación economicamente viables, competitivos e atractivos fomentando o crecemento e emprego sostible a través de accións formativas.

Tamén son beneficiarias dos apoios da Consellería do Mar un proxecto de mellora de seguridade na lonxa de Testal, actuacións destinadas á recuperación de bivalvos nos bancos areosos de Noia así como a dixitalización da confraría a través do Grupo de Acción Local do Sector Pesqueiro (Galp) Costa Sostible. Para o titular de Mar, estas accións amosan de xeito claro o compromiso do Goberno galego no apoio e reforzo do desenvolvemento e futuro do sector pesqueiro esencial na economía e creación de emprego no municipio.

Actuacións pendentes

A presenza do responsable autonómico tamén serviu para manter un encontro co rexedor noiés, Santiago Freire, e o patrón maior da Confraría de San Bartolomé, Santiago Cruz, cos cales abordou as necesidades e actuacións pendentes na localidade. Así, sinalou que a dragaxe do porto de Testal está pendente do informe de Costas do Estado para completar a tramitación ambiental do proxectos. Tamén indicou que os traballos de mellora dos pantaláns deste recinto portuario, demandados polos profesionais, xa foron executados recentemente.

Recuperación da produción

O conselleiro do Mar puxo en valor a recuperación da produción de bivalvos no 2024 despois do episodio de alta mortaldade de bivalvos provocado pola baixa salinidade das augas a causa do episodio extraordinario de fortes choivas acontecidas no outono do 2023. Así, o ano pasado rematou cun total de capturas destas especies de 500 toneladas, cinco veces máis que no ano anterior, e que alcanzaron un valor de 4,4 millóns de euros o que permitiu pechar o exercicio cuns ingresos de case 5,4 millóns de euros.