Santiago de Compostela, 19 de xaneiro de 2025

A Xunta quere simplificar a linguaxe administrativa para achegar unha información máis útil e sinxela á cidadanía e que os galegos e galegas poidan tomar decisións con coñecemento e seguridade. Para iso acaba de elaborar unha guía que ofrece recomendacións ao persoal empregado público para escribir da forma máis clara posible, tendo sempre en conta o perfil das persoas destinatarias.

A finalidade desta publicación é lograr que a comunicación entre a Administración e a cidadanía sexa máis fluída e eficaz, aumentar a comprensión dos documentos ofrecidos ao público e, deste xeito, incrementar a transparencia informativa e mellorar a satisfacción das persoas usuarias dos servizos públicos prestados pola Xunta de Galicia.

A guía acadou o segundo premio no concurso de persoal funcionario público innovador, convocado pola Axencia Galega de Innovación, na modalidade de simplificación administrativa.

Contidos da guía

A publicación estrutúrase en catro partes que seguen o fluxo lóxico da escritura, empezando por recadar a información precisa antes de empezar a escribir, organizar as ideas, redactar e revisar o texto antes de que vexa a luz.

Ademais, recolle tamén aspectos básicos da escritura web, con suxestións para adaptar o estilo do texto e o seu contido ás necesidades de internet, así como recursos multimedia dispoñibles para lograr unha comunicación máis eficaz.

A guía enmárcase dentro das competencias e funcións da Dirección xeral de simplificación, que procura a promoción e o impulso da redución de cargas burocráticas, facilitando o acceso da cidadanía aos servizos públicos dun xeito sinxelo. Para iso realiza un acompañamento aos distintos departamentos da Administración autonómica no deseño e implantación dos servizos públicos, buscando optimizar trámites e documentos, reducir as cargas administrativas, empregar de forma xeneralizada  comunicacións previas e declaracións responsables, así como potenciar a lectura fácil e a implantación da Administración electrónica, a aplicación de tecnoloxía innovadora e o ofrecemento proactivo dos servizos públicos, coa finalidade de mellorar a confianza e a resposta á cidadanía e ás empresas.