Brión (A Coruña), 17 de xaneiro de 2025

A conselleiro do Mar, Alfonso Villares, enxalzou esta mañá o papel das mulleres no sector do frigorífico e da elaboración e comercialización dos produtos conxelados derivados da pesca extractiva, na entrega dos premios da Asociación de Frigoríficos de Pesca Extractiva, que recoñecen a figuras destacadas no sector marítimo pesqueiro.

Villares presidiu a terceira edición deste galardón que recae este ano na bueuense Mercedes González Malvido, directora de Frigoríficos Rosa de los Vientos. O titular de Mar reseñou o acaído deste premio “nos tempos que vivimos nos que a posta en valor do labor da muller no sector está a tomar o protagonismo que sempre debeu ter”, reseñou. Na figura de Mercedes González, o conselleiro do Mar enxalzou ás mulleres “loitadoras, perseverantes e valentes que deron un paso adiante polas súas familias, por elas mesmas e por Galicia” e lembrou o “traballo, o esforzo, a experiencia e o coñecemento” das que entregaron “toda unha vida á pesca e ao mar”.

Nun acto celebrado no municipio de Brión e no que estivo acompañado pola directora xeral de Pesca, Acuicultura e Innovación Tecnolóxica, Patricia García, o responsable autonómico louvou a iniciativa dos premios Afripex e agradeceu ao seu actual presidente, Marcos Salgueiro, director xerente de Frigomar Burela, a convocatoria dun galardón “que deixa patente o compromiso de facer desta entidade un símbolo da Galicia do mar”.

O conselleiro do Mar dirixiuse persoalmente á homenaxeada á que entregou o premio para reseñar que “Mercedes é un exemplo de por que Galicia é hoxe o que é” e lembrou a súa traxectoria vinculada aos traballos do mar desde nena. Villares aplaudiu a “unha muller feita a si mesma” da que dixo “demostrou que é posible o liderado das mulleres, pese ao difícil que sempre dicimos que é”.