Santiago de Compostela, 29 de xaneiro de 2025

O conselleiro do Mar, Alfonso Villares, destacou hoxe no Parlamento o grao de execución do Plan de Competitividade e Sostibilidade do Marisqueo en Galicia 2024-2027 que está dotado con 123 M€ dos cales, dixo, que xa foron mobilizados 70 M€ en diferentes liñas de axuda ao sector. Recursos que permitiron realizar accións encamiñadas a reforzar a actividade extractiva, a mellora das zonas produtivas e implantar medidas de conservación dos recursos mariños.

Así, recordou que este mesmo mes de xaneiro a Consellería publicou no DOG varias liñas de axuda destinadas á mellora e xestión dos bancos marisqueiros así como para a restauración da biodiversidade e dos ecosistemas mariños mediante medidas de conservación por un valor conxunto de 3,4 M€. Deste xeito, reivindicou o traballo do Goberno galego enfocado en rexenerar máis bancos a curto e medio prazo, xerar novas zonas de traballo, reforzar a vixilancia e o labor dos biólogos, diversificar a produción e mellorar a comercialización ademais de procurar especies máis resilientes.

O titular de Mar encadrou a situación actual da produción nos efectos do episodio de alta mortaldade de bivalvos provocada pola abrupta baixada da salinidade das augas a causa das extraordinarias e intensas choivas do outono do 2023 do cal os bancos marisqueiros aínda non se recuperaron. Co obxectivo de mellorar a resiliencia da actividade marisqueira ante estes fenómenos, no marco dos efectos do cambio climático, a Consellería do Mar está apoiando o desenvolvemento de proxectos de investigación liderados polos centros de investigación mariña e das universidades da comunidade.

Entre as iniciativas financiadas polo Goberno galego destacou o proxecto Biorem, no que participa o Centro Tecnolóxico do Clúster da Acuicultura (Cetga) e no que colabora a Universidade de Coruña que aborda o estudo da implantación de estratexias de cultivo eficaces que faciliten a supervivencia dos bivalvos así como dous traballos a cargo da Universidade de Santiago de Compostela coa finalidade de, por un lado, obter marcadores moleculares de resistencia á salinidade no berberecho, e por outro, ao estudo dos efectos da carga de cultivo de moluscos sobre as rías galegas. Liñas de investigación que supoñen un investimento de case 1,3 M€ e que permitirán afondar na competitividade e sostibilidade da actividade marisqueira na comunidade.

O responsable autonómico reclamou unidade no desenvolvemento destas políticas, sustentadas no diálogo constante co sector e da man da mellor ciencia, para seguir identificando as causas que interveñen no descensos cíclicos da produción marisqueira para, mediante a aplicación de solucións biotecnolóxicas, mitigar os seus efectos. Un liña de acción sobre o que pivota a actuación da Consellería do Mar para garantir o futuro da actividade marisqueira que resulta esencial para Galicia.