Padrón (A Coruña), 13 de marzo de 2025

O conselleiro de Presidencia, Xustiza e Deportes, Diego Calvo, acompañado pola directora xeral de Administración Local, Natalia Prieto, visitou hoxe en Padrón o pavillón polideportivo do Souto para coñecer as melloras de eficiencia enerxética realizadas co apoio da Xunta a través do fondo adicional do Fondo de Cooperación Local. Durante a visita, o conselleiro anunciou a apertura, hoxe, do prazo para solicitar estas axudas a través da orde que establece os criterios e o procedemento para a distribución do fondo adicional, que conta cunha dotación de 5 millóns de euros. 

Segundo explicou, a medida publicada onte no Diario Oficial de Galicia vai dirixida aos concellos con poboación inferior a 15.000 habitantes e ten como obxectivo financiar obras de mellora de eficiencia enerxética en edificios municipais, con prioridade para instalacións deportivas, educativas, sociais, sanitarias ou culturais. 

Tamén se valora o tipo de investimento, con maior puntuación para a instalación de caldeiras  alimentadas con enerxías renovables ou reformas de cubertas a prol da eficiencia enerxética en infraestruturas de uso deportivo. A maiores tense en conta as melloras da envolvente térmica, na instalación eléctrica ou na iluminación, entre outras, así como a necesidade específica das actuacións previstas.

Diego Calvo apuntou que as achegas poden ascender ata os 60.000 euros por concello, sen que a contía poida exceder o custo da actuación, que debe ser dunha única fase e supoñer a posta en servizo inmediata do proxecto. 

Así, o conselleiro animou aos concellos a solicitar estas axudas, para o que dispoñen dun mes de prazo a partir de hoxe. As solicitudes presentaranse obrigatoriamente por medios electrónicos a través do formulario normalizado dispoñible na sede electrónica da Xunta de Galicia, https://sede.xunta.gal.

Apoio ás administracións locais

A medida enmárcase no apoio da Xunta ás administracións locais, co Fondo de Cooperación Local como instrumento central de colaboración económica para garantir a suficiencia financeira dos concellos. Nesta liña, Diego Calvo lembrou que neste exercicio o Fondo de Cooperación Local medra ata os 168 millóns de euros, 10 millóns máis que en 2024. As axudas do fondo adicional súmanse ademais a outras convocatorias xa publicadas, como a Orde de infraestruturas de uso público, dotada con 3,5 millóns de euros, o Fondo de Compensación Ambiental, que conta con máis de 11 millóns de euros, ou as axudas plurianuais á eficiencia enerxética cofinanciadas con fondos Feder e cun presuposto de 5 millóns de euros. A elas sumarase a liña de apoio a proxectos estratéxicos do fondo adicional do Fondo de Cooperación Local, posta en marcha en 2024 e dotada con 8,5 millóns de euros. 

Preto de 1,4M€ investidos en Padrón

Concretamente en Padrón, as obras visitadas hoxe contaron cunha achega de 60.000 euros, a máxima prevista na orde. O apoio da Xunta permitiu mellorar a eficiencia enerxética do pavillón do Souto a través de actuacións no illamento, co revestimento da cuberta e da parte alta das fachadas con la de roca, na climatización, coa substitución da caldeira de gasóleo por unha bomba de calor, e na iluminación, co cambio dos focos por outros con tecnoloxía Led.

Segundo sinalou Diego Calvo, calcúlase que estas actuacións permitiron reducir nun 40% o consumo anual de enerxía non renovable, así como mellorar o confort das persoas usuarias dunhas instalacións moi demandadas para actividades deportivas municipais e federadas, para escolas deportivas, actividades para maiores e outros eventos. Estas melloras súmanse ás realizadas na pista polideportiva tamén cunha achega da Xunta en 2023, no marco das axudas para obras nos equipamentos deportivos dos concellos ou a adquisición ou renovación de material deportivo para ser utilizado nestas instalacións. Neste caso concedéronse 50.000 euros especificamente para as obras e 8.300 para material.

A maiores, en 2024 Padrón beneficiouse da nova orde de axudas a proxectos estratéxicos, cunha achega da Xunta de case 400.000 euros para unha escola infantil, do Fondo de Compensación Ambiental, con 4.500 euros para a adquisición de equipamento para tarefas ambientais, e da orde de infraestruturas de uso público, con 50.000 euros ao proxecto conxunto con Dodro para a pavimentación dun camiño. No que se refire ao apoio do Goberno galego nos últimos anos, a contía achegada para diferentes actuacións ascende a preto de 1,4 millóns de euros.