Ourense, 28 de marzo de 2025

O delegado territorial da Xunta en Ourense, Manuel Pardo, participou na inauguración do festival literario astronómico Al-Majisti 2025 que se está a celebrar na vila ourensá, onde destacou o apoio levado a cabo polo Goberno autonómico para conseguir que Galicia se posicione como destino Starlight, con destinos como A Veiga, un dos primeiros en conseguir a certificación como lugar para gozar da contemplación do ceo.

O delegado territorial agradeceu á organización do festival literario a súa organización e indicou que con estas iniciativas se está a contribuír a avanzar nun modelo turístico sustentable e responsable que combina a observación do ceo nocturno coa divulgación e actividades de lecer relacionadas coa astronomía e o contacto coa natureza, como este festival literario.

No acto, Manuel Pardo, reflexionou sobre a orixe da astronomía que “xurdiu desde que a humanidade deixou de ser nómade e comezou a ser sedentaria; Despois de formar civilizacións ou comunidades, comezou o seu interese polas estrelas”. “A práctica destas observacións – continuou o delegado territorial- é tan verdadeira e universal que se atoparon por todo o planeta en todas aquelas partes onde viviron os seres humanos. Segue entón que a astronomía é probablemente unha das profesións máis antigas, manifestándose en todas as culturas humanas”.

“Por iso, -sentenciou Manuel Pardo- non resulta estraño que aquí, no cume de Galicia, xurda este extraordinario festival non só como un proxecto cultural no medio rural que tenta corrixir a comparativa coa oferta lúdica das cidades, senón que se trata, ao meu entender como un espazo de encontro, de relacións e fortalecemento das comunidades e da súa autoestima das que o espectro pedagóxico do mundo urbano debería tomar exemplo”.

Para rematar, o delegado territorial augurou a esta iniciativa o maior dos éxitos, así como vaticinou un longo percorrido nos anos. ”O estudo dos clásicos educa aos homes no duro traballo de desenvolver o pensamento crítico, e as xeracións que se atopen con este legado recoñecerán neles a fonte de inspiración que lles permita afondar dentro e artellar unha nova forma de vida”; concluíu.