A Xunta impulsa a tecnoloxía, o emprendemento e o deporte entre a mocidade cos novos ‘Campas 360’
A Consellería de Cultura, Lingua e Xuventude convoca 420 prazas na primeira edición desta iniciativa na que se ofrecen actividades formativas e de lecer
Están dirixidas a mozos e mozas de entre 12 e 30 anos e repartiranse en tres programas en Lugo, Sada e Vilanova de Arousa
O prazo de solicitudes estará aberto desde mañá, ás 10,00 horas, e pecharase o vindeiro luns, ás 22,00 horas, no portal web de Xuventude
Santiago de Compostela, 22 de abril de 2025
A Xunta de Galicia impulsará a tecnoloxía, o emprendemento e o deporte entre a mocidade cos novos Campas360, a primeira edición do programa de educación non formal dirixido aos mozos entre 14 e 30 anos. Trátase dun total de 420 prazas destinadas a ofrecer actividades formativas e de lecer durante as fins de semana do mes de maio.
Así, a proposta inclúe tres programas que se levarán a cabo en instalacións dependentes da Consellería de Cultura, Lingua e Xuventude. Deste xeito, o albergue xuvenil Lug 2, en Lugo, acollerá as actividades de tecnoloxía, mentres que no albergue xuvenil Marina Española, en Sada, levaranse a acabo as de emprendemento e no de As Sinas, en Vilanova de Arousa, ofreceranse as propostas deportivas.
Todos aqueles mozos e mozas que queiran participar nestas actividades poderán presentar a súa solicitude desde mañá, ás 10,00 horas, e ata o vindeiro luns 28, ás 22,00 horas, a través do portal de Xuventude, onde deberán elixir un único programa. Os postos repartiranse en función da chegada das solicitudes e o reparto nos campamentos será de 12 quendas que se dividirán en tres tramos de idade diferenciados; para a mocidade de 12 a 14 anos; de 15 a 17, e outro para maiores de idade de 18 a 30 anos.
Convivencia colaborativa, deporte e lecer saudable
Campas360 é un programa impulsado pola Consellería de Cultura, Lingua e Xuventude que pretende ofrecer á mocidade galega actividades de fin de semana cunha completa programación que vai desde a formación e a convivencia colaborativa ata o deporte e o ocio, cunha visión integral 360 que lles permita gozar dunha alternativa de lecer saudable.
Os participantes estimularán a súa creatividade a través de propostas innovadoras, fortalecerán as súas relacións interpersoais establecendo vínculos, favorecerase o uso dos deportes sostibles mellorando a súa eficiencia e minimizando o impacto ambiental, fomentarase o uso e o coñecemento do alberguismo en Galicia coa mobilidade xuvenil e facilitaranse alternativas de ocio saudable e seguro.
