A Xunta entregará a vindeira semana a Medalla de Ouro de Galicia á Princesa de Asturias
Trátase da máxima distinción que ofrece a comunidade autónoma e que recibirá nun acto en Santiago o 14 de xullo
O Executivo autonómico recoñece o seu vínculo a Galicia, logo dun ano de formación militar na Escola Naval de Marín, e traslada “o cariño” do pobo galego á Princesa Leonor e a Coroa
O resto de Medallas de Galicia serán aprobadas e anunciadas nos vindeiros días e se entregarán nun acto o 24 de xullo
Santiago de Compostela, 7 de xullo de 2025
O presidente da Xunta, Alfonso Rueda, anunciou que o Consello aprobou hoxe conceder a Medalla de Ouro de Galicia, a máxima distinción que se outorga na comunidade, á Súa Alteza Real, a Princesa de Asturias, dona Leonor de Borbón y Ortiz, “que a vindeira semana concluirá a súa formación na Escola Naval Militar de Marín”.
Con este galardón, o Executivo autonómico quere recoñecer “a presenza” de Leonor en Galicia así como “a pegada e a relación que a casa real mantén coa comunidade” e transmitir “o cariño sincero que a maioría dos galegos ten tanto á Princesa Leonor como a Coroa”.
A Princesa de Asturias recibirá a Medalla de Galicia nun acto que se celebrará en Santiago o vindeiro 14 de xullo, “dous días antes da entrega de despachos” na Escola Naval de Marín e no que está previsto a asistencia “dos Reis de España”.
O resto de Medallas de Galicia anunciaranse e aprobaranse nas vindeiras datas e serán entregadas, como é habitual, nun acto o vindeiro 24 de xullo.
Imaxes relacionadas
