Vigo, 6 de outubro de 2025

A conselleira do Mar, Marta Villaverde, mantivo este luns unha xuntanza de traballo co embaixador de Mozambique en España, Eugénio Agostinho Langa, na que consolidaron a relación existente entre as dúas rexións pesqueiras, e que xorde do destacado apoio que a Xunta vén prestando nos últimos anos ao sector pesqueiro do país africano, pois tanto Galicia como Mozambique teñen na pesca un dos principais piares da súa economía e da seguridade alimentaria das respectivas poboacións. 

Os dous dirixentes analizaron, entre outros asuntos, o memorando asinado no mes de xuño, a través do que o Goberno galego, xunto á Axencia Española de Cooperación Internacional para o Desenvolvemento (Aecid); ao Ministerio de Mar, Augas Interiores e Pesca do país africano; ao Grupo Nueva Pescanova, coa súa filial no país Pescamar; e á Asociación Mozambiqueña de Armadores de Pesca Industrial de Camarón (AMAPIC), impulsa no país africano a segunda fase do proxecto co que o Instituto Politécnico Marítimo Pesqueiro do Atlántico (Ipmpa) -centro de referencia nacional de pesca e navegación- realiza actividades de desenvolvemento curricular, material didáctico e formación, co fin de aumentar a capacitación dos profesionais do mar mozambiqueños. Marta Villaverde puxo así en valor o apoio do Goberno galego, pois leva aportando a súa experiencia e excelencia no desenvolvemento desta iniciativa desde 2019.

No encontro a conselleira e o embaixador sentaron as bases para seguir afondando na promoción dun sector pesqueiro máis competitivo e sostible nun país cunha importancia estratéxica para a cadea mar-industria galega vencelladas a especies de especial valor comercial. E é que o comercio co país africano, tanto nacional como galego, baséase na exportación de xurelo conxelado e na importación de lagostino.

A xuntanza tivo lugar no marco da celebración da XXVI Feira de Conxemar que se desenvolve en Vigo ata o xoves, e á que o país africano acode cunha ampla representación do seu sector no eido gobernamental e empresarial.