Santiago de Compostela, 19 de novembro de 2025

Os equipos de Inspección da Xunta de Galicia superaron as 2.000 visitas a centros de servizos sociais no 2024, que derivaron na apertura de diferentes expedientes. O dato avanzouno esta mañá a conselleira de Política Social e Igualdade, Fabiola García, no Pleno do Parlamento autonómico, onde defendeu o traballo e a profesionalidade dos inspectores.

Fabiola García criticou ao BNG por poñer en cuestión de maneira inxustificada o servizo de Inspección, que asegurou “é un piar fundamental para asegurar que o 100% da atención que se ofrece ás persoas máis vulnerables se presta con calidade, plenas garantías e total respecto aos seus dereitos”. Neste sentido, considerou unha  “irresponsabilidade” os intentos dos nacionalistas por desacreditar este servizo porque “xera inseguridade aos usuarios dos centros e ás súas familias, pon en cuestión a profesionalidade dos inspectores e ataca directamente o seu traballo”.

A conselleira asegurou que a maioría dos centros fan ben o seu labor e explicou que a inspección segue procedementos estritos, nos que se dá prioridade aos centros ou programas que reciben queixas ou denuncias e os que xa foron sancionados anteriormente, ademais dos que se inspeccionan por outras razóns puntuais.

Así mesmo, a titular autonómica de Política Social e Igualdade indicou que a programación das visitas se realiza e se valida dentro do propio equipo de inspección, sen coñecemento nin inxerencias externas. Tamén manifestou que cando o persoal de Inspección atopa calquera situación que poña en risco o benestar dos usuarios dos centros, a Xunta procede a pechar inmediatamente ao seu peche, como aconteceu coas vivendas comunitarias de Amoeiro e San Gabriel en Xinzo de Limia, as dúas de titularidade privada. As persoas usuarias destes centros deriváronse a prazas públicas.

Acusacións falsas contra o persoal da residencia de Monforte

Fabiola García puxo como exemplo de alarmismo, irresponsabilidade e falsidade as críticas do BNG sobre a situación na residencia de maiores de Monforte, nas que advertía de deficientes coidados, con brotes de sarna e mala alimentación. Unhas acusacións que foron desmentidas polo persoal e a directora do centro, que lamentaron que os nacionalistas fagan afirmacións que non son certas.