Lugo, 28 de novembro de 2025

O Consorcio Provincial Contraincendios e Salvamento de Lugo, financiado ao 50% pola Xunta e a Deputación de Lugo, aprobou hoxe os orzamentos de 2026 no pleno do organismo, no que participou o director xeral de Emerxencias e Interior, Santiago Villanueva, xunto co delegado territorial da Xunta en Lugo, Javier Arias. A contía ascende a máis de 10 millóns de euros, que supón un incremento do 30% respecto a este exercicio para dar cumprimento ao convenio colectivo asinado a principios de ano cos traballadores e traballadoras.

Do orzamento total, a Xunta achega 4,3 millóns de euros, a mesma contía que a Deputación provincial, mentres que os 1,4 millóns restantes serán aportados pola Unión Española de Entidades Aseguradoras e Reaseguradoras (Unespa).

A Xunta e a Deputación luguesa colaboran no funcionamento da media ducia de parques comarcais de bombeiros que dependen do Consorcio, con sedes en Monforte de Lemos, Chantada, Sarria, Barreiros, Vilalba e Viveiro. No pleno de hoxe aprobouse tamén a regulación das axudas sociais aos profesionais que traballan nestes seis parques.

Así, a incorporación de 26 efectivos ao persoal do Consorcio –que se sumarán aos 117 traballadores e traballadoras que hai na actualidade-, o aumento salarial anual de 6.000 euros na categoría de bombeiro ou a redución de 158 horas anuais –ata as 1.642- son algunhas das melloras pactadas cos profesionais no mes de xaneiro. E en setembro quedou aprobada unha aportación de case 2M€ para a mellora dos seis parques da provincia e facer fronte a esa suba laboral.

O Goberno galego mantén o seu compromiso na atención ás emerxencias en todo o territorio galego, neste caso para apoiar a actividade dos parques de bombeiros da comunidade, a través dos consorcios. Ademais, a Xunta colabora cos servizos de emerxencias dos concellos tanto no seu funcionamento como na dotación de equipamento.