Ferrol, 15 de decembro de 2025

A delegada territorial da Xunta en Ferrol, Martina Aneiros, mantivo esta mañá unha reunión coa directora da Asociación Provivienda en Galicia, Ana Pardo, para coñecer o traballo que desenvolve esta entidade sen ánimo de lucro que traballa a nivel estatal para mellorar a realidade socio-residencial e promover o dereito a unha vivenda digna e axeitada.

Tal e como indicou a delegada territorial, esta é unha das dez asociacións que operan no ámbito territorial de Ferrol que resultaron beneficiarias este ano das axudas a entidades privadas de iniciativa social para a promoción de actuacións de servizos sociais comunitarios e de inclusión social 2025-2027 da Consellería de Política Social e Igualdade por valor de 2,8 M€. No caso de Provivienda, a achega autonómica ascendeu a 670.500 euros.

A Asociación Provivienda, que xestiona 65.000 vivendas en 14 comunidades autónomas, iniciou a súa actividade en Galicia en 2017. Desde entón, leva facilitando o acceso a unha vivenda digna a máis de 300 persoas. Na cidade de Ferrol xestionan polo de agora dous fogares.

Aneiros destacou a importante labor que desempeña a entidade e lembrou que o Goberno galego colabora tamén coa asociación dende 2017 través das axudas con cargo ao IRPF para o financiamento de diferentes programas nos ámbitos da inclusión social, discapacidade, familia ou maiores.

Esta reunión de traballo enmárcase dentro da rolda de contactos que, de maneira continua, vén mantendo a delegada territorial con diferentes axentes do tecido asociativo da zona co fin de tomar o pulso ás demandas máis inmediatas con respecto á Administración autonómica.