A conselleira de Política Social e Igualdade mantivo hoxe unha reunión co alcalde do Pino sobre este servizo
Fabiola García avanza que os concellos poderán adherirse ao incremento do financiamento do Servizo de Axuda no Fogar desde finais de marzo
As administracións locais terán un mes desde a publicación da nova orde no Diario Oficial de Galicia para poder solicitar formalmente este incremento, que terá efectos retroactivos desde o 1 de xaneiro
A conselleira lembra que a Xunta achegará ata 2028 150M€ extra aos concellos para sufragar o SAF, elevando progresivamente o prezo por hora dos 12€ actuais aos 18€
Destaca que a Xunta inxectará máis de 400.000 euros extra ata 2028 para o financiamento do servizo de axuda no fogar no Concello do Pino
O Pino (A Coruña), 10 de marzo do 2026
A conselleira de Política Social e Igualdade, Fabiola García, avanzou hoxe que a Xunta de Galicia está ultimando os trámites necesarios “para facer efectivo o antes posible” o aumento da achega do Goberno galego ao financiamento do Servizo de Axuda no Fogar (SAF). Para isto, explicou que o Goberno galego está procedendo á actualización do módulo de financiamento do SAF.
Neste sentido, a conselleira destacou que o Goberno galego calcula que a nova orde será publicada no Diario Oficial de Galicia (DOG) na semana do 23 de marzo e que, seguidamente, os concellos contarán co prazo dun mes para poder solicitar formalmente este incremento, que terá efectos retroactivos con data 1 de xaneiro de 2026.
Fabiola explicou que “o procedemento será sinxelo” e que os concellos só terán que presentar a solicitude formal de adhesión, así como declarar que prestan o SAF cos servizos básicos regulados pola orde de 2009 e solicitalo dentro do prazo dun mes tras a entrada en vigor do texto.
Con esta actualización, que terá efectos retroactivos desde o 1 de xaneiro de 2026, o Goberno galego cumpre co obxectivo de aumentar progresivamente a achega da Xunta ao financiamento do SAF para persoas dependentes e, ademais, incentivase aos concellos para que presten este servizo con criterios comúns de calidade e homoxeneidade. Por último, a conselleira lembrou que grazas a este acordo, a Xunta achegará ata 2028 150M€ extra aos concellos para sufragar o SAF, elevando progresivamente o prezo por hora dos 12€ actuais aos 18€.
SAF O Pino
A conselleira reuniuse esta mañá co alcalde do Pino, Manuel Taboada, para avaliar o impacto que terá o acordo acadado entre a Xunta e a Fegamp para o incremento a achega ao Servizo de Axuda no Fogar (SAF).
Neste sentido, a conselleira lembrou que “se trata dun acordo histórico que suporá un incremento do 50% da achega do Goberno galego” a este servizo que é de competencia municipal. En concreto, explicou que no caso do concello do Pino, o incremento ao longo destes tres anos será de máis de 400.000 euros, co que a achega da Xunta a este servizo ata 2028 será de 1,4M€.
Imaxes relacionadas
