Santiago de Compostela, 23 de abril do 2026

A conselleira do Mar, Marta Villaverde, defendeu nun encontro organizado pola Oficina Europea para a Conservación e o Desenvolvemento (EBCD) en colaboración coa Axencia Europea de Medio Ambiente (AEMA) e a consultora científica DickeyCollas Marine, que os pescadores deben ter una participación activa no deseño de medidas de restauración dos hábitats mariños e a pesca sustentable.

No evento internacional, celebrado en Copenhague  (Dinamarca) e que a conselleira inaugurou por videoconferencia, destacou que a protección da biodiversidade e a actividade extractiva son dous piares importantes. “A restauración do medio mariño e o mantemento dunha actividade pesqueira sustentable, viable e rendible son obxectivos que van da man e non poden entenderse un sen o outro”, asegurou.

Este taller, que leva por título “Dos hábitats ás capturas: unha restauración que funcione para os pescadores”, está promovido da Xunta de Galicia, a través da Consellería do Mar, e reúne a autoridades europeas, científicos e representantes do sector pesqueiro co obxectivo de buscar estratexias conxuntas para a conservación dos océanos.

Na súa mensaxe de apertura, Villaverde destacou a transcendencia de abordar a restauración mariña contando coa participación activa de todos os axentes implicados, especialmente os que están máis ligados ao medio. “Os profesionais do mar e da pesca comparten este hábitat cos recursos naturais. Por iso, o éxito na concepción, no deseño e na implantación da estratexia de conservación dependerá da súa implicación nelas e de ser quen de incorporar todo o seu coñecemento, apostando pola cogobernanza”, subliñou.

A pesca na solución

A titular de Mar fixo fincapé en que, fronte a visións excluíntes, o sector extractivo ten que ser visto como un aliado estratéxico. Explicou que o obxectivo institucional debe ser consolidar un enfoque ecosistémico na xestión das pesqueiras que non só garanta a sustentabilidade ambiental, senón tamén a viabilidade económica e social das frotas. “A restauración do medio mariño axudará a impulsar actuacións que complementen a xestión actual da pesca e reduzan a súa presión alí onde sexa máis conveniente e sensato facelo”, sinalou.

Para rematar, Villaverde agradeceu ás entidades organizadoras a iniciativa de celebrar este taller e reafirmou o compromiso da Xunta con este tipo de foros europeos. “Compartimos preocupacións, prioridades e criterios en relación coa sustentabilidade do medio mariño e por iso consideramos que temos moito que aportar”, concluíu a conselleira, desexando que as dúas xornadas de traballo en Copenhague resulten frutíferas e construtivas para o futuro do sector marítimo-pesqueiro continental.