Santiago de Compostela, 13 de maio de 2026

A directora xeral de Administración Local, Natalia Prieto, fixo balance hoxe no Parlamento galego da actual campaña de retirada de niños de avespa velutina tras a renovación da encomenda á empresa pública Seaga á que a Xunta destina un ano máis 1,7 millóns de euros. Así, no que vai de ano retiráronse máis de 600 niños desta especie, máis dun 4% por riba dos 578 rexistrados o ano pasado nestas datas. Desta cifra, 313 corresponden a niños retirados na provincia da Coruña, 255 na de Pontevedra, 24 na de Lugo e os 10 restantes na de Ourense. Este plan centralizado de retirada de niños de avespa velutina acordado cos concellos permitiu a retirada de máis de 24.500 niños no ano 2025.

Tal e como explicou a directora xeral, trátase dun plan “vivo” que avanza cada ano co obxectivo de mellorar os resultados acadados e seguir loitando contra esta especie para reducir o seu impacto e reducir a intranquilidade que lles ocasiona á veciñanza a súa presenza. Nesta liña, a Xunta realiza a encomenda da retirada a Seaga, que conta cun equipo de coordinación que organiza aos equipos de intervención. Prevese, segundo detallou Natalia Prieto, que nos meses de verán nos que a presenza desta especie é maior, realicen estas tarefas máis de 60 operarios, aos que o Goberno galego dota aos equipos do material necesario co obxectivo de que poidan traballar con seguridade e eficacia.

Cómpre lembrar que o Goberno galego ofrece unha solución homoxénea, centralizada e coordinada cos 313 concellos galegos para a eliminación ou neutralización de niños desta especie. A Xunta xa viña traballando desde 2014 nun programa de vixilancia e control para minimizar o impacto da avespa asiática na comunidade e, ante o aumento da súa presenza, decidiu redobrar en 2020 os esforzos e actuar cun plan centralizado colaborando cos concellos nos traballos de retirada e extinción dos niños para frear o seu avance.

Natalia Prieto tamén aclarou que a colaboración cidadá é clave na loita contra esta especie e instou a contactar co Teléfono de  Atención e Información á Cidadanía 012. Desde a alerta recibida no teléfono 012, o equipo de Seaga procede á retirada no menor tempo posible, se ben hai casos onde os niños son inalcanzables ou dificilmente accesibles e requiren actuacións complementarias ou permisos administrativos ou de propietarios.

Cando os avisos se corresponden cunha urxencia -engadiu- son derivados aos servizos de emerxencias a través do 112 para a súa retirada inmediata como, por exemplo, niños activos no interior de vivendas habitadas, zonas moi concorridas ou se se trata de persoas alérxicas. Neste sentido, instou a extremar a precaución sobre todo no caso de persoas alérxicas e, en ningún caso intentar manipular o niño cos propios medios. Do mesmo xeito, sinalou a importancia de ter tamén especial coidado á hora de realizar labores de limpeza de fincas e rozas ou outros traballos agrícolas, xa que a avespa velutina pode aniñar no chan.

Por outra parte, a directora xeral de Administración Local fixo referencia ao aumento da colaboración cidadá grazas a que cada vez a cidadanía ten máis información sobre a forma de actuar e máis canles para comunicar os avisos. Ademais da atención telefónica a través do 012 a Xunta habilitou nos últimos anos outras vías complementarias para avisar da presenza da avespa velutina como o chatbot ou o robot virtual baseado nas últimas tecnoloxías de intelixencia artificial. Tanto o chatbot como o robot virtual están operativos as 24 horas do día dos 365 días do ano.