Santiago de Compostela, 25 de maio de 2026

O presidente da Xunta, Alfonso Rueda, anunciou que o Consello aprobou hoxe o Plan Senda 2028, dotado de 24,4 millóns de euros, e que busca “mellorar os servizos dixitais da xustiza e avanzar cara un sistema máis eficaz, personalizado e accesible”.

O Plan busca adaptar a Xustiza dixital de Galicia ao novo marco legal estatal, introduce a intelixencia artificial como elemento central e transversal e achega o servizo á cidadanía, sobre todo nas áreas rurais. O Plan traslada á Xustiza dixital a visión da Estratexia Galicia Dixital 2030.

Do orzamento de 24,4 millóns de euros, 17,5 millóns corresponden a fondos da Comunidade Autónoma e 6,9 millóns ao programa Galicia Feder 2021-2027. Este investimento súmase aos 43 millóns de euros investidos no Plan Senda entre 2020 e 2025.

O Plan Senda 2028 asume o desafío de adaptar a Administración de xustiza de Galicia ao novo marco legal estatal establecido pola Lei orgánica 1/2025 e polo Real decreto lei 6/2023. Ademais de axustarse ao novo modelo organizativo de tribunais de instancia e oficinas de xustiza no municipio, que achegan os servizos a toda a poboación, o plan introduce a intelixencia artificial como elemento central e transversal. Entre as novas utilidades que empregan esta tecnoloxías están o novo visor intelixente do expediente xudicial (Viaexe), os asistentes virtuais ao servizo das persoas que traballan na Administración de xustiza ou a explotación intelixente da información forense.

Novo sistema bilingüe de xestión procesual

Unha das principais novidades é a substitución do sistema de xestión procesual Minerva por Atenea, unha plataforma tecnolóxica moderna bilingüe, plenamente interoperable e adaptada ao novo modelo organizativo. Este cambio é o resultado de dous convenios asinados co Ministerio de Xustiza. A posibilidade de usar o idioma galego no sistema de xestión procesual foi demandada insistentemente pola Xunta de Galicia.

De acordo coa Estratexia Galicia Dixital 2030, e como sucede no resto da Administración e os servizos públicos de Galicia, implántase un modelo de xustiza orientada ao dato. Isto permite configurar uns servizos máis eficaces e máis personalizados. Neste sentido, créase o Rexistro de Datos Mestres de Xustiza (RDMX), con sistemas de consulta sinxelos para o persoal interno e para a cidadanía.

Oficinas de xustiza do municipio

O Plan Senda 2028 permitirá consolidar as 268 oficinas de xustiza do municipio (OXM) como puntos de acceso próximo para a cidadanía en concellos sen sede xudicial. O obxectivo é achegar a Xustiza ao rural, evitar desprazamentos, favorecer a cohesión territorial e evitar o despoboamento.

Ademais, poñerase en marcha Conecta Xustiza, “un sistema de atención remota, que permitirá facer trámites por videoconferencia” e que beneficia especialmente a persoas que residen en áreas rurais ou que teñen problemas de mobilidade.

Haberá, así mesmo, un asistente virtual especializado (Conversa Xustiza) que proporcionará soporte técnico para os servizos dixitais e que ofrece información e orientación en linguaxe natural e comprensible sobre os servizos e trámites dispoñibles.

Tamén se consolidarán as prestacións dixitais das oficinas de atención á vítima do delito, coa incorporación “de atención remota por videoconferencia para as vítimas” con dificultades de desprazamento. Estas oficinas prestan atención, entre outras, ás vítimas de violencia de xénero.

Créase a Canle Xustiza, para a información, divulgación e educación xurídica, dirixida á cidadanía en xeral e, especialmente, á xuventude, co obxectivo de achegar o sistema xudicial á sociedade e reducir a fenda dixital.

As persoas sen habilidades dixitais disporán do programa Acompaña, un sistema integral de atención presencial nas sedes xudiciais, que garantirá a accesibilidade universal e empregará unha linguaxe clara e accesible.

O Instituto de Medicina Legal de Galicia (Imelga) avanza cara a xestión dixital de probas e evidencia cunha maior garantía na canle de custodia, incorpora ferramentas de teleperitaxe e aplicará a explotación intelixente da información forense para identificar patróns e tendencias.

O Plan tamén introduce certificados de sinatura cuántica en mobilidade para avogados e persoal xudicial, o que sitúa a Galicia na vangarda da seguridade criptográfica aplicada á xustiza.

Plan Senda 2025

O Consello tamén recibiu un informe sobre os resultados do Plan Senda 2025, que consolidou a universalización da Xustiza dixital en Galicia. Entre os resultados destaca a evolución de 77 salas de vistas dixitais que había en 2021 a completarse a dixitalización da totalidade das salas (211). “E pechamos 2025 con 170.000 expedientes xudiciais electrónicos, cando no 2021 era algo residual”, salientou o presidente.

O Plan Senda 2025 permitiu a creación das oficinas de información ás vítimas do delito nas sete cidades de Galicia, nas que se seguiron máis de 1.500 expedientes en 2025.

Entre os proxectos singulares e pioneiros destaca a automatización das comunicacións de autopsias ao INE, un sistema que reduce moito o traballo burocrático dos forenses.