Santiago de Compostela, 8 de xullo de 2026

A delegada da Xunta na Coruña, Belén do Campo, xunto ao director xeral de Defensa do Monte, Manuel Francisco, asistiron esta mañá ao acto de toma de posesión do coronel Luis Borque Torres como novo xefe do Aeródromo Militar de Santiago, celebrado na Praza de Armas das instalacións militares de Lavacolla.

Durante o acto formalizouse o relevo na xefatura da unidade, que pasa a estar dirixida polo coronel Luis Borque Torres, quen substitúe ao coronel Juan Pedro Velázquez Gaztelu, tras dous anos ao fronte da base.

O Aeródromo Militar de Santiago desempeña un papel estratéxico como base de apoio ás operacións do Exército do Aire e do Espazo no noroeste peninsular. Ademais da súa actividade militar, estas instalacións adquiren unha especial relevancia durante a campaña de alto risco de incendios forestais ao acoller o despregamento dos medios aéreos  encargados das tarefas de extinción.

Os medios aéreos na loita contra os incendios forestais, especialmente durante a época de maior risco, permiten actuar con rapidez nos primeiros momentos dos lumes, reforzar o traballo dos equipos terrestres e mellorar a eficacia das tarefas de extinción e protección da poboación e do patrimonio natural.

A delegada da Xunta trasladoulle ao coronel Luis Borque Torres os seus mellores desexos nesta nova etapa á fronte do Aeródromo Militar de Santiago e desexoulle moitos éxitos no desempeño das súas novas responsabilidades. Tamén desexoulle moitos éxitos ao anterior xefe Juan Pedro Velázquez-Gaztelu Fernández de la Puente no seu novo destino en EEUU.