Alfoz do Castrodouro (Lugo), 18 de agosto de 2026

O delegado territorial da Xunta en Lugo, Alfonso Villares, reuniuse hoxe coa alcaldesa de Alfoz do Castrodouro, Efigenia Maseda, no marco das visitas institucionais que está a realizar aos concellos da provincia. A xuntanza serviu para analizar as principais necesidades e facer seguimento dos proxectos e investimentos autonómicos no municipio.

Entre as iniciativas máis recentes impulsadas polo Goberno galego, Villares referiuse á achega de máis de 52.000 euros ao abeiro do Fondo de Compensación Ambiental (FCA) non competitivo para a adquisición dun camión destinado a reforzar os medios municipais para a protección do medio natural.

O delegado destacou outras actuacións promovidas nos últimos meses en Alfoz do Castrodouro a través de diferentes programas de colaboración, como a instalación dunha caldeira de pellets para o subministro de calefacción e auga quente sanitaria no pavillón municipal, a mellora da eficiencia enerxética da Casa do Concello e da escola infantil ou o reforzo da sinalización turística no municipio. Lembrou tamén a reparación da cuberta do ximnasio do IES Alfoz-O Valadouro, que contou cun investimento da Xunta de máis de 32.300 euros.

No encontro tamén se fixo referencia á aprobación definitiva do Plan Básico Municipal, promovido pola Xunta, que dota ao concello dun instrumento eficaz de ordenación do territorio e lle permite ofrecer capacidade de acollida residencial e económica.

O delegado territorial puxo en valor o compromiso da Xunta cos concellos, especialmente cos de menor poboación, ”co fin de ampliar e mellorar os servizos e as dotacións públicas, e contribuír a que a veciñanza dispoña de máis e mellores oportunidades para vivir, traballar e desenvolver os seus proxectos de futuro no territorio”.