Santiago de Compostela, 26 de xullo de 2026

A conselleira do Mar, Marta Villaverde, acompañada pola directora xeral de Desenvolvemento Pesqueiro, Ángeles Vázquez Suárez, visitou hoxe no centro CIS de Santiago de Compostela aos alumnos e alumnas que participan no primeiro curso de Garda Rural na especialidade de gardapesca marítimo.

Esta acción formativa pioneira, promovida pola Consellería do Mar, ten como finalidade facilitar a incorporación de novos profesionais cualificados para velar pola seguridade, o control e a protección dos recursos nos bancos marisqueiros e nas zonas de produción pesqueira da comunidade.

A iniciativa, impartida entre maio e outubro ao longo de 15 xornadas lectivas, achega os coñecementos teóricos e a preparación física precisos para acadar a acreditación necesaria. A superación deste curso constitúe un requisito indispensable para que os aspirantes poidan concorrer ás probas oficiais de Garda Rural que convocará o Ministerio do Interior en Madrid o vindeiro mes de novembro. Co obxectivo de acadar unha representación territorial equilibrada, a adxudicación inicial das 20 prazas reservou un máximo de dúas por concello entre os solicitantes que cumprían os requisitos de acceso e aptitude.

Durante a visita ás instalacións, Villaverde destacou o papel estratéxico que desenvolven os gardapescas na contorna das confrarías de pescadores e dos plans de explotación. A titular de Mar lembrou que a súa actividade a pé de praia e nas rías resulta imprescindible para frear o furtivismo, garantir o cumprimento da normativa vixente e asegurar a sustentabilidade biolóxica e económica das actividades marítimo-pesqueiras.

Esta acción específica compleméntase co conxunto de medidas que a Consellería do Mar desprega para cualificar e modernizar o capital humano da cadea extractiva. Neste senso, a conselleira lembrou que o seu departamento mobiliza 800.000 euros a través do Fondo Europeo Marítimo, de Pesca e de Acuicultura (FEMPA) na orde de axudas de formación náutico-pesqueira para apoiar ás entidades do sector na capacitación permanente, na remuda xeracional e na seguridade a bordo.