Santiago de Compostela, 1 de outubro de 2026

Galicia pechou o verán de 2026 cunha evolución positiva da actividade turística, cun incremento do 8,2% da rendibilidade e uns ingresos hoteleiros de 160,7 millóns de euros, un 8% máis que no mesmo período de 2025.

Esta evolución está acompañada por un incremento da demanda turística. Galicia rexistrou máis de 4,9 millóns de noites no conxunto do aloxamentos turísticos, un 2,1% máis que no verán anterior, a cifra máis elevada da serie histórica para este período. O comportamento positivo da demanda reflectiuse nos dous meses, en concreto, en  aumentaron un 1,5 % en xullo e un 2,5 % en agosto.

O crecemento explícase principalmente pola mellora da estadía media, que aumentou un 4,4%, ata as 2,3 noites. En canto ao número de viaxeiros, entre xullo e agosto, a comunidade rexistrou algo máis de 2,1 millóns de viaxeiros aloxados.

Un dos principais elementos da evolución turística do verán foi o comportamento do mercado internacional, que continúa gañando peso no conxunto da demanda. O turismo internacional incrementou un 13% en canto a demanda respecto do verán de 2025, acompañado por un crecemento similar do número de viaxeiros aloxados. Entre xullo e agosto, visitaron Galicia máis de 658.000 turistas internacionais, un 4,5% máis que nos mesmos meses de 2025. A estadía media incrementouse neste segmento o 8,1%.

Esta evolución permitiu que o mercado internacional superase por primeira vez na serie histórica o millón de pernoctacións durante o período estival, con preto de 1,1 millóns de noites.

Como consecuencia deste forte crecemento, o turismo internacional representa xa o 22 % do total das pernoctacións de Galicia, preto de dous puntos porcentuais máis que no verán anterior e a maior cota da serie histórica.

O Instituto Nacional de Estadística (INE) fixo públicos hoxe os datos turísticos de establecementos extrahoteleiros relativos ao mes de agosto. Deles despréndese de que desde xaneiro a agosto, aloxáronse en establecementos galegos máis de 1,11 millóns de viaxeiros que fixeron 2,7 millóns de noites, un 2,5% máis que no mesmo período de 2025. A estadía media situouse entre xaneiro e agosto en 2,37 noites, un 4,4% máis con respecto aos meses de xaneiro a agosto de 2025.