A conselleira de Infraestruturas e Mobilidade participou hoxe na conmemoración do 40º aniversario da Federación Galega do Transporte de Mercadorías
Ethel Vázquez salienta que a Xunta estuda a implantación de tarifas nocturnas con bonificacións nas autoestradas autonómicas

Vázquez Mourelle explica que estas novas bonificacións nas autoestradas A Coruña- Carballo (AG-55) e do Val Miñor (AG-57), en horas de pouco tráfico, tamén poderían ser competitivas para o sector do transporte de mercadorías por estrada

En relación á AP-9, lembra que a Xunta lle solicitou ao Ministerio de Fomento que analice fórmulas de flexibilización e un abaratamento dos desprazamentos para os usuarios recorrentes e en horas de menos tráfico

Fai fincapé en que o transporte de mercadorías por estrada constitúe unha peza fundamental para o funcionamento dos demais motores económicos, polo que a Xunta seguirá traballando da man do sector para que acade os seus obxectivos

Concreta que a formación  destes profesionais é primordial, tal como amosan os Orzamentos de 2019, que do mesmo xeito que no exercicio anterior, reservan unha partida de 400.000 euros para este fin

Santiago de Compostela, 24 de novembro de 2018.- A conselleira de Infraestruturas e Mobilidade, Ethel Vázquez, xunto co director xeral de Mobilidade, Ignacio Maestro, subliñou hoxe que a Xunta está a estudar a implantación de tarifas nocturnas con bonificacións nas autoestradas autonómicas.

Así o manifestou na conmemoración do 40º aniversario da Federación Galega do Transporte de Mercadorías (Fegatramer), onde explicou que estas novas bonificacións nas autoestradas A Coruña- Carballo (AG-55) e do Val Miñor (AG-57), en horas de pouco tráfico, tamén poderían ser beneficiosas e competitivas para este sector.

Sinalou que o Goberno galego non é alleo ao impacto que ten o incremento das peaxes no conxunto do tecido económico e social de Galicia. Neste sentido, en relación á AP-9, a Xunta solicitoulle ao Ministerio de Fomento que analice as posibilidades de suavizar as subas de peaxe previstas, a través de fórmulas de flexibilización e un abaratamento dos desprazamentos para os usuarios recorrentes e en horas de menos tráfico.

Indicou que un bo sistema de bonificacións incrementaría o tráfico da autoestrada, redundaría en maior seguridade viaria e na mellora da competitividade de todo o sector do transporte, ao aforrar tempo e custos.

No que se refire ao anuncio do Ministerio de Fomento da posibilidade de cobro de peaxes nas autovías, reiterou que cómpre dispor dunha proposta seria e concreta sobre a que se poida reflexionar con responsabilidade e rigor. Non obstante, resaltou que a Xunta actuará sempre en defensa dos intereses xerais dos galegos.

A titular de Infraestruturas fixo fincapé en que o transporte de mercadorías por estrada constitúe unha das pezas fundamentais para o funcionamento dos demais motores económicos dunha sociedade.

O Executivo autonómico coñece as necesidades do sector, polo que quere seguir traballando da súa man para avanzar na consecución dos obxectivos marcados. Así, por exemplo, Galicia devolve cada ano o 100% do céntimo sanitario ao conxunto do transporte profesional.

Indicou que o Goberno galego tamén vén apostando por poñer en marcha mecanismos que fomenten a competencia e axuden a abaratar os prezos dos carburantes. Neste sentido, o Consello da Xunta autorizou recentemente o inicio da tramitación do decreto polo que se regula o procedemento integrado para a implantación de instalacións de distribución polo miúdo de produtos petrolíferos e o seu rexistro, co obxectivo de outorgar axilidade e eficiencia a estes procedementos.

Nesta continua aposta polo sector do transporte, a Xunta tamén considera fundamental a formación  destes profesionais, tal como amosan os Orzamentos de 2019, que do mesmo xeito que no exercicio anterior, reservan unha partida de 400.000 euros para este fin.

A Consellería de Infraestruturas e Mobilidade, dende o ano 2009, destinou 4,3 millóns de euros ás axudas á formación, que posibilitaron a realización de 1.400 cursos que beneficiaron a máis de 20.000 transportistas.

Imaxes relacionadas
Data de actualización: 24/11/2018