Unha delegación de Portugal interésase pola experiencia galega en materia de prevención e extinción de incendios forestais

O director xeral de Defensa do Monte, Tomás Fernández-Couto, recibiunos no Centro de Coordinación Central de incendios, ubicado en San Lázaro

Ademais de coñecer o propio operativo, a delegación mostrou especial interese nas medidas tomadas polo Goberno galego en materia de prevención, sobre todo as relacionadas coa limpeza de faixas secundarias
 

Santiago de Compostela, 11 de febreiro de 2019
  • whatsapp

O director xeral de Defensa do Monte, Tomás Fernández-Couto, recibiu esta mañá unha delegación de Portugal interesada en coñecer o traballo da Consellería do Medio Rural en materia de prevención e extinción de incendios forestais. Trátase dun grupo de técnicos municipais da Comunidade Intermunicipal da rexión de Coímbra, integrada por varios concellos do centro de Portugal.

O director xeral amosoulles o Centro de Coordinación Central de incendios forestais e explicoulles o traballo que se realiza desde esta base operativa. Así mesmo, salientou tamén a posta en marcha da Rede de Vixilancia dos espazos forestais como un instrumento de apoio ao labor de detección, prevención e seguimento dos incendios. Fernández-Couto insistiu na importancia deste servizo, composto por 44 centros que permiten monitorizar o 54% do territorio galego.

Doutra banda, na xuntanza mantida co director xeral tamén se lles deu conta dos últimos cambios levados a cabo en canto a distancias de plantacións e xestión da biomasa. A delegación portuguesa mostrouse moi interesada neste aspecto, sobre todo no tocante á limpeza das faixas secundarias e á posibilidade de que a propia Administración poida actuar de forma subsidiaria nestes labores.

Fernández-Couto informoulles de que a prevención é a parte fundamental na loita contra os incendios e trasladoulles que a Xunta destina un total de 11,6 millóns de euros en 2019 para financiar os convenios de colaboración coas entidades locais galegas en materia de prevención e defensa contra os incendios forestais. Ademais, profundizou tamén no convenio de colaboración subscrito entre a Consellería do Medio Rural, a Federación Galega de Municipios e Provincias (Fegamp) e Seaga, que permitirá a creación na nosa comunidade dun sistema público de xestión da biomasa nas faixas secundarias para protexer os núcleos de poboación.

Ademais de coñecer o Centro de Coordinación Central de incendios, a delegación de Portugal tamén se achegou ata as instalacións de Meteogalicia. Mañá desprazaranse ao concello da Estrada para visitar a Axencia Galega de Emerxencias (Axega).
 

Imaxes relacionadas
Departamento: C. do Medio Rural
Data de actualización: 11/02/2019