A Xunta presenta en Santiago a iniciativa comercio 360 coa que aposta pola dixitalización, a economía circular e o produto local

A directora xeral de Comercio e Consumo, Sol Vázquez, asistiu hoxe a un curso sobre transformación dixital en sectores tradicionais, onde informou das medidas desta acción que ten como obxectivo principal impulsar a competitividade do comercio e a súa modernización

Cun orzamento de 5,7M€ para este ano, promoverá a implantación de laboratorios comerciais nas sete grandes cidades e unha liña de axudas á ecoinnovación
 

Santiago de Compostela, 17 de xuño de 2019

A directora xeral de Comercio e Consumo, Sol Vázquez, asistiu hoxe en Santiago de Compostela a un curso sobre transformación dixital en sectores tradicionais, que organiza Incyde co apoio da Xunta e da Cámara de Comercio de Santiago, no que participan 25 persoas, onde informou sobre a nova iniciativa Comercio 360, coa que a Xunta aposta pola dixitalización do comercio, a economía circular e o produto local. En palabras da directora xeral, o obxectivo principal desta acción e darlle un pulo ao sector mellorando tanto a súa competitividade como a súa modernización.

As novas medidas, que xa están en marcha, pretenden dar resposta ás demandas dos clientes, anticipándose ás súas necesidades, e adecuarse aos novos hábitos que se teñen detectado no eido comercial.

Vázquez explicou aos comerciantes que Comercio 360 desenvolverase ata 2021 destinándose neste primeiro exercicio 5,7M€ para poñer en funcionamento medidas de sensibilización, axudas para a ecoinnovación e laboratorios comerciais, que se suman á convocatoria de modernización e dixitalización do comercio de proximidade que convocou este ano a Consellería de Economía, Emprego e Industria.

Para promover o labor de sensibilización e divulgación do Comercio 360, a Xunta levará a cabo xornadas e a análise de casos de éxito, así como a posta en marcha dun espazo web específico.

Por outra parte, publicará unha liña de axudas á ecoinnovación para impulsar a economía circular e a sustentabilidade no comercio a través da adhesión á plataforma do tícket dixital
–que permite aos clientes e comercios coñecer o estado e garantía das súas compras ou vendas evitando a perda ou deterioro do tícket tradicional e minimizando o uso do papel–;
da promoción dos ecoenvases realizados con materiais cen por cen biodegradables;
ou implantando proxectos de economía circular que fomenten a reciclaxe e os produtos ecolóxicos.

Outra das novidades será a creación de sete laboratorios comerciais nas principais cidades galegas para asesorar e impulsar o Comercio 360, achegando aos interesados servizos personalizados de mentoring, comunicación e publicidade, marketing intelligence ou mellora da xestión, entre outros.

Esta nova iniciativa, dirixida a pemes de menos de 10 traballadores, enmárcase na Estratexia de impulso á competitividade do comercio de proximidade e ten como obxectivo ofrecer aos establecementos unha folla de ruta para conseguir un comercio diverso, moderno e adaptado ás novas realidades –reforzando tanto a súa imaxe física como dixital– e servizos, o que permitirá dinamizar tamén os centros urbanos das cidades e vilas galegas para facelos máis atractivos aos cidadáns, turistas e visitantes.

A Xunta márcase tres obxectivos prioritarios coa posta en marcha desta iniciativa: lograr que 10.000 comercios galegos se sumen á estratexia 360; que máis de 1000 establecementos se beneficien dos servizos de asesoramento; e que 5000 comercios incorporen no seu modelo de xestión a aposta pola sustentabilidade e o tícket dixital.

 

Imaxes relacionadas
Data de actualización: 17/06/2019