O presidente da Xunta e o conselleiro de Sanidade reúnense cos representantes do Consello Galego de Colexios Médicos

A Xunta e os Colexios de Médicos acordan avanzar no impulso da atención primaria e na compatibilidade da práctica profesional

Os facultativos expresaron ao Goberno galego que, na súa opinión, é necesaria unha reestruturación territorial da atención primaria

A Xunta pide aos representantes dos médicos apoio para incrementar a capacidade formativa e contar con máis prazas MIR

Coinciden no diagnóstico sobre as principais dificultades que afronta o sistema sanitario, fundamentalmente a falta de médicos

Compartir
  • whatsapp

Santiago de Compostela, 29 de novembro de 2022 O conselleiro de Sanidade, Julio García Comesaña, anunciou hoxe que a Xunta acordou co Consello Galego de Colexios Médicos avanzar no impulso á atención primaria e na compatibilidade da práctica profesional. Estas foron as principais conclusións do encontro que presidiu o titular do Goberno galego, Alfonso Rueda, no que pediu o apoio dos Colexios para incrementar a capacidade formativa e contar con máis prazas MIR e unidades docentes.

Os representantes dos facultativos expresáronlle á Xunta que, na súa opinión, é necesaria unha reestruturación territorial da atención primaria.

Ambas partes coincidiron durante a reunión no diagnóstico sobre as principais dificultades que afronta o sistema sanitario, fundamentalmente a falta de médicos. García Comesaña subliñou que desde o ano 2009 xa se duplicaron as prazas de formación de medicina de familia en Galicia e que o 90 % dos profesionais que rematan esta especialidade quedan traballando no Servizo Galego de Saúde.

Así mesmo, o conselleiro reiterou o compromiso da Xunta de flexibilizar, antes do remate deste ano, os criterios de compatibilidade para os médicos que traballan tanto en centros públicos como en privados.

 

Imaxes relacionadas
Data de actualización: 29/11/2022