A Xunta destaca que a estabilidade de Galicia permite que os orzamentos entren en vigor cada ano en tempo e forma

Miguel Corgos participou nun almorzo informativo con empresarios organizado por APD onde subliñou que estas contas se elaboraron para dinamizar a economía e mitigar a suba de prezos

Estes presupostos achegan certezas aos axentes económicos e á cidadanía e ascenden a 12.600 M€

Ademais, reforzan o gasto social e os investimentos, volven baixar impostos e consolidan as rebaixas xa aprobadas

Santiago de Compostela, 17 de xaneiro de 2023 O conselleiro de Facenda e Administración Pública, Miguel Corgos, destacou hoxe que a estabilidade institucional e política de Galicia permite que os orzamentos da Comunidade entren en vigor cada ano en tempo e forma.

Así o explicou durante a celebración dun almorzo-coloquio informativo con empresarios organizado pola Asociación para el Progreso de la Dirección (APD) en colaboración con Caixa Rural Galega, onde subliñou que estas contas achegan certezas aos axentes económicos e á cidadanía, algo esencial para favorecer o crecemento económico.

Neste sentido, o conselleiro subliñou que os orzamentos deste ano se elaboraron co obxectivo de contribuír a mitigar os efectos da suba de prezos, sobre todo nos sectores máis vulnerables; favorecer un impulso para dinamizar a economía nun momento de ralentización da actividade; e proseguir coa modernización dos servizos públicos.

Modelo fiscal propio

Durante a súa intervención, Miguel Corgos explicou que Galicia ten un modelo fiscal propio e previsible cunha senda propia desde hai máis dunha década. Neste sentido, sinalou que neste 2023 as familias son o centro das políticas de loita contra a inflación mediante baixadas nos impostos. O obxectivo é mitigar os efectos da inflación na renda dispoñible das familias e reforzar o impulso da reactivación económica.

Neste marco, e entre outras medidas, o conselleiro explicou que se deflactan con carácter retroactivo a 1 de xaneiro de 2022 os tres primeiros tramos do IRPF e rebáixase o tramo máis baixo, e auméntanse os mínimos persoal e familiar; o que beneficiará con máis intensidade ás rendas máis modestas.De media, cada contribuínte galego pagará 476 euros menos que no ano 2009.

Ademais, segundo explicou o conselleiro, os orzamentos deste ano tamén reforzan con máis de 500M€ adicionais cinco liñas prioritarias de actuación para acompañar a familias e empresas nesta conxuntura de alza de prezos e con medidas para impulsar a competitividade.

As liñas de actuación inclúen medidas de apoio e protección das familias e das persoas máis vulnerables; medidas de aforro e eficiencia enerxética; medidas de dinamización económica; medidas de protección do medio ambiente, loita contra a seca e o cambio climático; e finalmente medidas de fortalecemento dos servizos públicos autonómicos.

Estas cinco liñas están perfectamente encaixadas na planificación deseñada no Plan Estratéxico de Galicia 2022-2030, de feito, estes son os primeiros orzamentos en clave Galicia 2030 nos que se inclúen as prioridades dos eixos e obxectivos estratéxicos da folla de ruta trazada pola Xunta para esta década.

Imaxes relacionadas

Facenda

Departamento:

C. de Facenda e Administración Pública

Data de actualización: 17/01/2023

Novas relacionadas

Miguel Corgos felicita aos novos graduados do Centro de Estudios Superiores Universitarios de Galicia

Miguel Corgos participa nunha visita do alumnado do CEIP Monte dos Postes ao edificio administrativo de San Caetano dentro da Semana do Goberno Aberto

Galicia reduciu a súa débeda en máis de 200 M€ no último ano e 1,4 puntos a ratio débeda/PIB